Ми шаплыесь но кужмоесь, бадӟым улонлы ни дасесь

Удмурт Элькунысь Алнаш, Вавож, Эгра, Шаркан, Якшур-Бодья ёросъёсысь но Башкортостанысь командаосты Зар-Вишур гуртын улӥсьёс пӧсь табанен, ческыт чаен но шулдыр кырӟанъёсын пумитазы. Егитъёсты ӟечкыласа вераськизы Зар-Вишур муниципал кылдытэтлэн тӧроез Е. В. Широбокова, Шаркан ёрос администрациен кивалтӥсь В. Г. Муклин, Удмурт Элькунысь егитъёслэн ужъёссыя министрлэсь ужзэ быдэсъясь М. Г. Сорокин, Удмурт Элькунысь Калыкъёслэн Эшъяськон юртазы ужась А. Н. Прокопьев. Быдэ вуымтэосты ӟечкыланы Тол бабай но кожылӥз. Солэн резиденциез (соин газетмылэн вуоно номеръёсаз тодматомы) Шаркан ёросэ интыяськемын угось. Собере вожвылъяськонэ вуэм командаослы кампет коробкаос сётӥзы. Отчы пӧртэм лыдпусъёс ватскемын вылэм. Башкортостанысь командалы тямыс лыдпус шедиз. Берло тодмо луиз: ужрадэз дасясьёс таӵе аспӧртэм амалэн жеребьёвка ортчытыны малпаллям. Озьыен, Татышлы ёросысь егитъёс визитказэс тямысэтӥен возьматозы. Вожвылъяськонэз кутскиз Якшур-Бодьяысь «Ворекъясьёс» команда. Та вакытэ тросэз шӧдӥзы, татысь егитъёс вожвылъяськонэ вормыны вуэмын шуыса. Но мукетъёсыз командаос но лябесь вылӥллямтэ. Быдэ вуымтэос кырӟаны-эктыны но устоесь вылэм, маскаръяськыны но йӧноесь. Нош интеллектуальной конкурсын егитъёс понна ӧжыт гордэктоно луиз. Котькудӥз команда удмурт калыклэсь сям-йылолъёссэ ляб тодэмзэ возьматӥз. Но егитъёс югдурез квест-шудонын тупатыны быгатӥзы. Соослы татын но удмурт лулчеберетэз, сям-йылолъёсты ӟеч тодэмзэс возьматоно вал.

Квест-шудонын командаослы Зар-Вишур гуртлэсь картазэ сётӥзы. Со егитъёслы укмыс станциосты ортчонын юрттыны, пе, кулэ. Котькудаз станциын соос визьзэс, кужымзэс, «бадӟым улонлы» дась луэмзэс возьматыны кулэ. Быдэ вуымтэослы финише одӥг час куспын вуоно. Собере но соослы бадӟым кузьым понна йырзэс, пе, ужатоно луоз на. Азьпалтыса верало, квест-шудон ортчыку командаысь кыкез егитъёс перепеч пыжонын устолыксэс возьматӥзы. Башкортостанысь команда таӵе ужез Алёна Самигуловалы но Анита Аскаровалы оскиз. «Шудонысь вуэм берады ческыт перепечен утялтомы», - оскытӥзы нылъёс командая эшъёссэс.

Командаос стартэ, ог-огзылы люкетонтэм вылысь, пӧртэм сюресъёстӥ кошкизы. Но соос пӧлысь котькудӥз укмыс пӧртэм станциос пыр потӥз. Со сяна, квест-шудон куноосты Зар-Вишур гуртэн ӟечгес тодматӥз. Тани одӥгез команда культура юрт вӧзысь бадӟым выж вылэ дугдэм. Татын вылэм соослэн нырысетӥ станцизы. Солэн «кузёез» егитъёсты выжысь юбоослэсь лыдзэс вераны куриз. Кема лыдъяськемзы-малпаськемзы бере соос шуизы: «куатьтон куать». Собере командалы бадӟым кузьымез шедьтон понна нырысетӥзэ валэктонэз сётӥзы. Нош Башкортостанысь командалэн сюресэз мукет ульчаысен кутскем. Выж вылэ соослэн берпуметӥез станцизы интыяськемын вылэм. «Нырысетӥосаз станциосын суредъёсты интыосазы тыроно вал, лабиринт пыр но потоно луиз», - вера командалэн капитанэз Денис Ахметзянов. Нош берло соослы одӥг буквалэсь кутскись кылъёсын быдэс предложение малпано луиз. Со сяна, командаез одӥг пичигес котыресэ пырыны куризы на. Зэм, со туж ӧжыт адямилы чакламын вал. Соин егитъёслы татын йырзэс трос бергатоно луиз: озьы кинъёс ке пал пыд йылазы султӥзы, кинъёс ке нылъёсты ныпъязы.

Вань станциосты ортчыса, татышлыос финише нырысетӥен вуизы. Озьы ке но шумпотыны вазь на вал. Табере бадӟымзэ кузьымез шедьтон сярысь сюлмаськоно. Со понна нылъёслы но пиослы котькуд станциын валэктон сётӥзы.Соосты огазеямзы бере, егитъёс валатскизы: кытчы ке чечы ватэмын. Команда сое азбаре пуктэм муш умортоысь шедьтӥз.

Квест-шудонысь вуисьёсты нылъёс ческыт перепечен кунояны оскыто ке но вал, тросэзлэн малпанзы ӧз быдэсмы. Ужрадэз ортчытӥсьёс тямыс командалы кык гур гинэ дасяллям угось. Татышлыослы перепечез кема возьмано ӧз луы. Ӝоген нылъёс соосты гуре пуктылӥзы. Вераны кулэ, Шарканын удмурт калык пӧрез выль амалэн пыжоно луиз. Татын сое ӝуась гур азе пуктыса пыжо. Оло соин ик тросэзлэн нылъёслэн пӧръёссы ӧжыт ӝуазы. Башкортостанысь нылъёс тазэ но конкурсэз капчиен ортчизы. Соослэн пыжиськемзы ческыт но чебер пӧрмиз. «Ми туннэ тӥледыз алмаен перепечен куноялом», - веразы нылъёс жюрилы. Зэм, берло валэктӥзы на, Татышлы ёросын, пе, картофкаез алма шуо. Вераны кулэ, та нуналэ жюрилы олокӧня пӧртэм перепечъёсты сиёно луиз. Асьме дорын гинэ сое картофкаен тросгес пыжо вылэм. Перепеч пыжемзы бере тросэз нылъёс шутэтскыны кошкизы, нош Алёна Самигуловаез выль конкурс вите на вал.

Таяз конкурсэ котькуд командаысь одӥг ныл но одӥг пи пыриськизы. Отын шудӥсьёсты быръён понна татышлыослы пус куштоно луиз. Озьы Башкортостанысь командалэсь данзэ Алёна Самигуловалы но Денис Ахметзяновлы утьыны кылдӥз. Соос куать пӧртэм эскеронъёсты ортчизы. Кылсярысь, пияш но нылаш ошмесысь карнанэн ву ваизы, пу вандӥзы но пильылӥзы, черсӥзы, пыжен уязы, пӧртэм калык эктонъёсты быдэстӥзы. Учкисьёслы татын паймымон луиз асьмелэн командаысьтымы егитъёслэн эктыны быгатонзы но кужымзы. Алёна Самигулова, кылсярысь, аслаз чиед пельпумаз тыр ведраосысь одӥг шапык вузэ но виятытэк вуттӥз. Солэн вуэз котькинлэсь трос луиз. Нош мукетъёсаз конкурсъёсын тросгес удалтӥз вавожъёслы, соос – вормисьёс.

Егитъёслэн быдэ вуэмзылы сӥзем «Эру» шулдыръяськонлы йылпумъянъёс лэсьтыса «Шунды» мер огазеяськонлэн тӧроез Ольга Тронина вераськиз. Со ик вормись командаосты но шараяз. Татын тужгес кужмо луизы кузёос – Зар-Вишур гуртысь быдэ вуэмъёс. Соослэсь ӧжытлы берегес кылизы Вавожысь егитъёс. Нош куинетӥ интые потӥз Башкортостанысь команда. Берло пумиськонэз йылпумъяса БР-ысь удмуртъёслэн НКЦ-зылэн кивалтӥсез С. Г. Гарифуллин но историяя но культурая центрен кивалтӥсь И. М. Самигулова вераськизы. Соос куноосты пумитасьёслы тау карон кылъёссэс веразы но башкир шаерысь вуттэм синпель кузьымзэс сётӥзы.