Киужъёсыз шумпотто, сюлэмез буйгато

Интернет вотэсысь одноклассники сайтын алигес «Мои рукоделия» выль группа усьтӥськиз. Сое кылдытон сярысь Янаулысь нылпи садын воспитательын ужась Лиля Ахмадуллина сюлмаськиз. Зэм, кибашлы нылкышнолэн отын быдэстэм ужъёсызлэн кӧня ке люкетэз гинэ возьматэмын. Интернет вотэсэ тросгес солэн пӧртэм амалъёсын лэсьтэм топиарийёсыз гинэ пуктэмын. Нош Лиля Владимировна пужыятӥськыны но, ыльнянен ужаны но яратэ вылэм. Вераны кулэ, киужен соос быдэс семьяенызы выро. Кылем арын, кылсярысь, соослэн кичӧлтэмзыя ульчаязы нылпиослы шудон площадка кылдӥз. Берло пиналъёсын ӵошен отчы аспӧртэм пальма «мерттӥзы». Писпу пластик бутылкаослэсь лэсьтэмын. Нош палэнынгес тодмотэм машина сылэ. Сое дасян сярысь Лиля Владимировналэн Александр кузпалыз сюлмаськем. Табере солэн машинаяз нуналлы быдэ сямен пиос ворттыло.

Туэ южтолэзьысен инвожоозь Янаулысь музейын, мукет кибашлыосын ӵош, Лиля Ахмадулинналэн пужыятыса быдэстэм ужъёсыныз адӟытон радъяськиз. Солэн киужъёсыз шоры трос калык синмаськыса учкиз. Угось соос пӧлысь котькудаз кузёзылэн шуныт но усто киосыз шӧдӥсько. Нош кызьы кылдӥллям та выллем чебересь киужъёс? «2013-тӥ арын дышетонъя ёзэтын гудырикошкон толэзе ортчоно совещаниын мастер-класс ортчытыны куризы. Со пумысен малпаськи но, топиарий лэсьтыны малпай, - вера Лиля Ахмадуллина. - Янаулын сыӵе киужен вырисьёс ӧй вал на. Топиарий лэсьтыны нырысь интернет пыр дышетски. Собере ачим малпаса лэсьтылӥсько. Туннэ киужъёсме шумпотыса ӵыжы-выжыосмылы, тодмоосмылы, нылпиосмылэн дышетӥсьёссылы, эшъёсылы кузьмасько». Туннэ, гажано лыдӟисьёсмы, тӥледлы Лиля Ахмадуллиналэн быдэстэм ужъёсыныз тодматскыны ӵектӥськом. Со сяна, кузпалызлэсь нылпиослы дасям машиназэ возьматӥськом на.