-11 °С
Салкым
Вань иворъёс
Общество
1 январь 2021, 02:00
Гурт улонэз азинтон - одӥгез валтӥсь ужпум
Башкортостанын мувӧй поттон, ӝутӥськон но мукет удысъёсты азинтон сяна, гурт улонэз тупатонлы но бадӟым саклык висъяське. Республикамылэн Тӧроез Рустэм Хамитов Кун-Собранилы-Курултайлы вазиськоназ но со сярысь кылпум ӝутылӥз. «Асьмелэсь экономикамес ӝутонын валтӥсь инты басьтэ агропромышленной комплекс. Куд-ог ёросъёсын пӧртэм проектъёсы пыриськонлэн, мега-комплексъёсты ӝутонлэн, фермаосты выльдонлэн емышъёсыз шӧдскымон ӧвӧл на», - шуиз со. Соин ар ӵоже ни республикаямы та удысэз азинтон понна пӧртэм сюресъёс утчало. Гурт удысын тыршисьёслэн нуналазы ужасьёсты но соосын тодматӥзы.
Башкортостанын мувӧй поттон, ӝутӥськон но мукет удысъёсты азинтон сяна, гурт улонэз тупатонлы но бадӟым саклык висъяське. Республикамылэн Тӧроез Рустэм Хамитов Кун-Собранилы-Курултайлы вазиськоназ но со сярысь кылпум ӝутылӥз. «Асьмелэсь экономикамес ӝутонын валтӥсь инты басьтэ агропромышленной комплекс. Куд-ог ёросъёсын пӧртэм проектъёсы пыриськонлэн, мега-комплексъёсты ӝутонлэн, фермаосты выльдонлэн емышъёсыз шӧдскымон ӧвӧл на», - шуиз со. Соин ар ӵоже ни республикаямы та удысэз азинтон понна пӧртэм сюресъёс утчало. Гурт удысын тыршисьёслэн нуналазы ужасьёсты но соосын тодматӥзы.
Кысконо пудоосты вордон
Башкортостанын кысконо пудоосты вордонъя выль программа дасяське. Со республикаысьтымы хозяйствоослы тросгес йӧл дасяны, пе, юрттоз. «Та программаез ӟеч быдэстыны быгатӥм ке, 2020-тӥ арозь араз 1 миллион тонна йӧл но солэсь дасям сиёнъёсты вузаны луоз», - вераз Рустэм Хамитов.
2017-тӥ ар кутсконысен республикаямы 1,4 миллион тонналы матэ йӧл кыскемын. Со пӧлысь 600 сюрс тонналы матэез магазин ӝажыосы потэмын. «Азьланяз та лыдпусъёсты ӝутоно, - вера Рустэм Хамитов. – Туннэ нуналэ куд-ог хозяйствоосын котькуд скалзылэсь 6 сюрс килограммлэсь трос йӧл кыскизы ни. Таӵе лыдпусъёсын соос шаерысьтымы азьмынӥсь хозяйствоосын ӵошатскыны быгато. Вераны кулэ, республикаямы пудо вордон удысын выль технологиосты паськыт куто ни.
Муш утён
2021-тӥ арын республикаямы муш утисьёслэн «Апимондия» конгрессы ортчоз. Нош али «Чечыё гурт» проект бордын ужало.
- Асьмелэн одӥгез бадӟымез вормонмы – мушкасьёслэн Стамбулын ортчем «Апимондия» конгрессазы Башкортостанлэн заявкаезлэн вормонэз. Соин азямы муш вордонэз азинтон, чечылэсь ӟечлыксэ ӝутон ласянь бадӟым ужпумъёс пуктэмын, - вера Рустэм Хамитов. – Туннэ «Чечыё гурт» проектлэн концепциез дасяське. Отын республикаысьтымы муш вордонлэн историеныз но солэн азинскон сюресэныз тодматозы.
Егит ӧнерчиослы – 300 сюрс манет коньдон
Вуоно арысен гурт удысын ужаны кутскись ӧнерчиослы одӥг пол 300 сюрс манет коньдон сётӥськоз. Республикалэн Тӧроезлэн верамезъя, республикаысьтымы егитъёс пӧлысь тросэз городэ улыны интыяськыны тыршо. Соин гуртъёс быро, ужась киос уг тырмо. Азьланяз, пе, соослэсь уждунзэс будэтон сярысь но сюлмаськоно.
Гуртын ужасьлы – дан
Гурт удысын тыршисьёслэн нуналазы Рустэм Хамитов республикаысьтымы устооссэ пудо утисьёсты, ю-нянь будэтӥсьёсты данъяз. Татышлы ёросысь «Рассвет» СПК-ысь водительлы Фёдор Гайдуллинлы, кылсярысь, «За самоотверженный труд в Республике Башкортостан» гадьпус сётэмын. Нош Янаул ёросысь «Колхоз Восток» СПК-ысь кунян утись Ирина Давлетханова Башкортостан Республикалэн Данъян грамотаеныз пусъемын, «Мичуринский» ООО-ысь парсь вордон фермаын ужась Анфиса Шакирова – БР-ысь Гурт хозяйствоя министерстволэн дипломеныз.
Дасяз Ольга
НИГАМАТУЛЛИНА.
Новости партнеров