-9 °С
Салкым
Вормонлы - 80 ар
Вань иворъёс
Общество
3 декабрь 2020, 12:10

Дорамы мед вуоз анай кылынымы газет, яке кызьы гожтӥськыны луэ «Ошмес» газетлы

Туннэ, 3-тӥ декабре, газет-журналъёслы гожтӥськон декада кутскиз. Со 13-тӥ толсурозь кыстӥськоз. Та вакытэ дунъёс кӧнялы ке уськытэмын. Газет-журналъёслы пӧртэм амалъёсын гожтӥськыны луэ.Нырысетӥез гожтӥськон амал – почта ёзэтъёс пыр. Татын, кылсярысь, декада вакытэ «Ошмес» газетлы гожтӥськон дун 394 манет но 44 коньы. Зэм, таӵе амалэн гожтӥськыны мылкыд кариды ке, нырысь ик гуртъёсысь почта ёзэтъёслэсь ужан нуналъёссэс тодоно. Табере соос арняяз куинь нунал гинэ ужало угось. Соин тӥледлы почтальонэз дорады вазьыны ӵектысалмы. Соку почта ёзэтъёсын кузь черодын сылоно уз луы. Нош гуртысь почтальонэз котькуд вакытэ шедьтыны луоз – тӥледлы юрттоз телефон но интернет. Татышлы ёросысь Вязовкаысь культура юртын но библиотекаын ужасьёс но «Ошмес» газетлы гожтӥськон понна одӥгаз нуналэ уж дуразы гуртысьтызы почтальонэз Ольга Давлетхановаез вазизы.

Кыкетӥез гожтӥськон амал – редакция пыр гожтӥськон. Со понна уж нуналъёсы 8(34778) 2-18-71 номеро телефонъя яке вотэс бамъёс пыр редакцие вазиськоно. Таӵе амалэн гожтӥськон дунтэмгес – 300 манет. Но, азьпалтыса верало, тӥ газетлы редакциын гожтӥськемын ке, сое почтальон дорады уз вутты, со понна асьтэлы редакцие лыктоно луоз.
Куинетӥез гожтӥськон амал – Россиысь почталэн сайтэз (https://podpiska.pochta.ru/) но «Республика Башкортостан» Издательской домлэн сайтэз пыр (https://rbsmi.ru/). Онлайн амалэн гожтӥськон понна трос дыр кулэ ӧвӧл: нырысь регистрация ортчоно, собере газетлы гожтӥськоно. Вераны кулэ, азьвыл аръёсы интернет пыр газетлэн электронной версиезлы гинэ гожтӥськыны луэ ке вал, табере со кагаз газет басьтӥсьёслы но бадӟым юрттэт луоз. Нош https://rbsmi.ru/ сайтлэн луонлыкъёсыз воксё паськытатэмын. Табере «Ошмес» газетлы телефон пыр qr кодэн гожтӥськыны луоз.
Асьтэос шӧдӥськоды, коронавирус газет-журналъёслы гожтӥськыны уг люкеты. Дыртэ «Ошмес» газетлы гожтӥськыны. Дас нунал туж ӝог ортчоз! Собере кузьымъёсты шудытон дыр вуоз.
Читайте нас: