Гуртэз, калыкез сярысь сюлмаськонэн улэ

- Школаез йылпумъяме бере ик фермае ужаны вамыштӥ. Апай тямысэтӥ классэз быдтӥз но Уфае кошкиз. Анаймылэн тазалыкез ляб луэмен, мон гуртэ кыли. Атаймы мыным куать арес дыръя улонэн люкиськиз, – вера Валентина апай. – Ужаны кутскыкум колхозмы но кужмо, фермаосмы но пудоосын узыр вал. Мон скал кыски. Куамын вить йыр скалъёсты аппаратэн ке но кыским, тыл кысыку, киын но кыскиськом вал.Пичиысен кыдаса будэм нылаш ужлэсь кышкамтэ. Удысаз рос-прос тыршем, ужзэ оскымон но ӟеч быдэсъям. Сюлмысь тыршемез сое скал кыскисьёс пӧлын азьветлӥсьёслэн радазы поттэм. 1990-1995-тӥ аръёсы Валентина Гатиновнаез ёрос кенеше депутатэ но бырйылӥллям. Со гуртысьтызы арлыдоослы али но быгатэмезъя юрттыны тырше. Тросэз В. Багаутдиновалы пу басьтон но мукет ужъёс пумысен вазиськыло. Берлось кызь арзэ Валентина Гатиновна гуртысьтызы клубен кивалтэ. Солэсь быгатонлыкъёссэ лыдэ басьтыса ик та ужез оскизы, луоз. Уго В. Багаутдиновалы крезьгуро ужрадъёсы пыриськон пичиысен ик пыӵамын. «Классмы милям туж шаплы вал. Котькуд ужрадэ мыло-кыдо пыриськылӥм. Ми Флида эшеным котьку кырӟаськом вал. Бусые концерт пуктыны но ӵем ветлылӥм, - вера Валя апай. – Фермаын ужакум но ужрадъёсы пыриськылӥ». Шутэтскыны потыса но Валентина Гатиновналэн мылкыдыз задор. Со тросгес шулдыръяськонъёсты ортчытъяны тырше. Праздникъёс дыръя концертъёс дася, егитъёслы дискотека радъя, быръёнъёсын ужа. Валентина апайлы ужрадъёсты ортчытыны Инзиля Байрукова, Альмира Тимерханова, Светлана Гильманова, Нина Шарафиева, Люция Ровникова но Укарина Апсаликова юртто. «Тросмы пенсиын ни. Инзиля Байруковамы гинэ Карыш гуртын нылпи садын ужа, - вера клубен кивалтӥсь. – Ужрадъёсамы пӧртэм кырӟанъёс чузъясько. Удмуртсэ милемлы Укарина кузьма. Уж дурам бадӟым юрттэт возьмато гуртамы будэм но али палэнын улӥсь гуртоосмы Фларид Файрушин, Ильдар Валентинов но Рауль Гареев. Соос вазиськыку куронъёсылы саклык висъятэк уг кельто». Валентина Гатиновна «Ошмес» газетэн но эшъяське. Удмурт кылэз ӧй дышеты ке но, газетэз дорам но, клубе но, пе, басьтӥсько. Удмурт кыл сяна, со бигерзэ, ӟучсэ но умой тодэ. «Внучкаосы но куинь кылъёсты тодо-валало. Уфаын улӥсь куинь пиосмы пӧлысь кыкез кузпалъяськемын ни. Али Рашид кузпалыным гинэ улӥськом на», - вера Валентина апай. Рашид Тауфикович ужан аръёсаз вордӥськем музъем вылаз тыршем. Со шутэтскыны потытозяз тракторен ужам. Рашид агай али но корт валэзлэсь уг люкиськы. Турын, пу дасян но мукет ужъёсты быдэсъя. Со техникаез ӟеч тодэ. Соин гуртоосыз Рашид Тауфикович доры юрттэт курыса но вазисько. Куамын сизьым ар ӵош улэм Багаутдинов кузпалъёс куспазы но, калыкен но огкыл шедьто. Соослэн быдэсъям ужъёссы пичи гуртын шумпотымон но адӟем карымон луо. Марина НИКОЛАЕВА. Балтач ёрос.