Анай луон – со бадӟым шумпотон

Вошъяськись улонлы учкытэк, Анна но Филюс Кайрановъёс трос нылпи утё, соос пӧлысь тросэз нылпи юртъёсысь басьтэмын.
Кызьы меда ваньмыз кутскиз? «Асьмелэн куинь пиосмы. Мон котьку одӥг ке но нылмы мед луоз шуыса малпасько вал. Кузпалылы ныл басьтон сярысь мылкыдме усьтӥ. Пиосмы но пумит ӧз луэ. Пӧртэм интыосы вуылӥм: Первоуральске, Ревдае, Калтасы ёросысь Калмаше, Нефтекамске. Даша нылмес больницаысь, нылпи ёзэтысь, шедьтӥм. Солы тямыс толэзь вал. Вань кулэ кагазъёс дась луытозь, нылмылы дас толэзь тырмиз. Дыр туж ӝог ортче. Кематэк солы 12 арес луоз ни. Со витетӥ классын дышетске. Даша нылмес кык ар утим но, ёрос администрациысь опекая но попечительствоя ёзэтэн кивалтӥсь А. З. Ганиева апаен сузэръёсты - Женяен Таняез – басьтыны ӵектӥз. Соосты дорамы арнялы гинэ куное ваимы вал. Тэльмырись синъёслэн «Можно мы останемся» шуэмзы вань улонмес воштӥз. Нылъёс кылизы но бордазы мукетъёсыз вуизы», - тодаз вае трос нылпи будэтӥсь анай.
Собере вуиз Камилла. Али солы 12 арес. Со Нефтекамскысь коррекционной школаын дышетске. Денис нимо пияш Кайрановъёслэн семьяязы ар но ӝыны, анаез пытсэт сьӧрысь потытозь, улэм. Анжелика Калтасы ёросын вордскемын. Кайрановъёс доры вуытозяз, со мукет приёмной семьяын улэм. Собере опекая ёзэт нылашез Кайрановъёслы ӵектэм. Со татын кык ар ини.
Кирилл но Настя – агаен сузэръёс. Пияш выль анай-атайлы, мукет нылпиос борды туж секытэн дышем. Настя, ачиз пичи ке но (али солы вить арес), котьку агайзэ утьыны тырше.

Асьсэлэсь нылпиоссэс лыдъяса, Кайрановъёслэн семьяязы дас нылпи. Анайзы Анюта – утись, чаклась но буйгатӥсь, атайзы Филюс – сюдӥсь, нылпиосызлэн бадӟым эшсы но. Кузпалъёс пиналъёссэс ужаны дышетонлы но бадӟым саклык висъяло. Соос бакчаязы ма гинэ уг мертто! Вылысь Балтаче газ пыремын ӧвӧл бере, пу но дасяно луэ. Азбаре вуэмзэ ваньзэ атаенызы пиналъёс утялто. Со сяна, нылпиос анайзылы корказэс утялтыны, пудо пыртыны, турын дасяны, ӟазегпиосты утьыны юртто. Сюлмаськись анайлэн трос дырыз кухняын ортче. Нылпиос анайзылэсь пыжем чебурекъёссэ, лапшаен шыдзэ, манной ӝуксэ тужгес ярато.
Анюта котькуд нылпиез сярысь трос вераны быгатоз. Со ваньзэс огкадь адӟе. Котькуд нылпиезлэн аслаз сямыз, аспӧртэмлыкез, пе. Даша нылзы, кылсярысь, азьло пичиесь нымы-кибыослэсь но кышка вылэм, нош будэмъяз со соосты эскерыны кутскем. Анюта оске, школаын умой дышетскись нылъёсыз, азьланьын но дышетскыса, умой профессия басьтозы шуыса.
Кайрановъёслэн корказы гужем трос адями люкаське. Бадӟым пиоссы - Пермьын но Чернушкаын улӥсь Эрик но Элвис кузпалъёсынызы, Пермьын дышетскись Дэни – атай юртазы ӵем вуыло. Пичиос соосты чидатэк витё. Агайёссы уго котьку саламъёсын берто, соосын шудо-верасько. «Уг малпаськы вал, сомында нылпиосы луозы шуыса. Куинь нуналскын соос ваньзы монэ анай шуизы ни. Секытсэ уд малпаськы, дорад анай шуыса лыкто бере, мон соослы кулэ. Со – тужгес бадӟым шумпотон», - шуэ дас нылпиослэн анайзы Анна Кайранова.