Туннэ "Ошмес" газетлэн нырысетӥ редакторезлы Андрей Гильмаевлы 83 арес тырмысал

Андрей Васильевич Гильмаев - журналист, шаерчи, тодмо гожъясь, Башкортостан Республикаысь культура удысысь сӥё-дано ужась, республикаысь удмуртъёс понна потӥсь «Ошмес» газетлэн нырысетӥ валтӥсь редакторез. Лякыт, визьмо сямо, мур тодон-валанэн удмурт воргорон. Таӵеен кылемын дуно но гажано гожъясьмы сое тодӥсь адямиогслэн малпанъёсазы.

Куатетӥ шуркынмонэ Андрей Васильевичлы 83 арес тырмысал.

Андрей Гильмаев удмуртъёслэн гинэ ӧвӧл, со - пӧртэм калыкъёслэн данъяськымон адямизы. Писательлэн веросъёсыз, новеллаосыз, этюдъёсыз мукет кылъёсы но берыктэмын. Солэн быгатыса гожъяськемез, инкуазез улэпен адӟытэмез, гурт калыкез данъямез, вакытъёсты герӟаны быгатэмез уродлык но ӟечлык куспын нюръяськонэз возьматӥсь тодмет выллем луо, лыдӟисьлэн сюлмаз шунытлык пыӵато. Андрей Васильечилэн нимыз, солэн лэсьтэм ӟеч ужъёсыз но верам кылъёсыз котьку пӧламы улозы, ноку уз вунэ.