Мӧзмыны дырыз ӧвӧл

Пермь шаерысь Куеда ёросысь Кирга гуртын будэм нылаш шудзэ Чиндэр гуртысь шедьтэм. Константин та гуртэ ӵужмуртэз доры куное вуылэм. Соку ик егитъёс ог-огзэс пумиталлям но бӧрысь семья кылдытӥллям. 1970-тӥ арысен Бибиасма Актемировналэн улон но ужан сюресэз Чиндэр гуртын азинтӥськем. Ужаны со тямысэтӥ классэ йылпумъямез бере ик кутскем. «Одӥг толэз фермаын тырши но собере Ростовской областе вербовать каризы. Отын одӥг но ӝыны ар бертытэк чугун сюрес вылын ужай. Уждун тыризы ке но, рельсаосты вошъян нылкышноослы туж секыт луиз», - вера Бибиасма Актемировна. Чиндэрын солы пичи кунянъёсты утьыны оскиллям. «Куинь кузя 150-лы матэ кунянъёсты утьылӥм. Пудоосмы тазаесь, куинь центнерозь будылӥзы, - вера Б. Минликаева. – Ферма ӝутыны кутскемзы бере, ӝутӥськонын ужай, гурт удысын пӧртэм ужъёсты но быдэсъяй».
Бибиасма Актемировна али огназ улэ. Быдэс уж сюрессэ фермаын скотникын тыршем Константин кузпалызлэн улонысь кошкемезлы дас ньыль ар луэм ни. Озьы ке но солэн мӧзмыса улыны дырыз ӧвӧл. Нуналлы быдэ сямен дораз нунокъёсыз вуыло. «Сизьым нылпиосмылэн кыкез – Альберт пимы но Ельвира нылмы – гуртамы уло, мукетъёсыз – городъёсын, - вера со. - Гужем бакчаын ужасько, нылпиосы доры ветлӥсько. Керттӥськыны но яратӥсько. Киужъёсы трос люкаськемын ни. Соосты нылпиосылы сётӥсько, матысьёсылы кузьмасько».