Зарни сюанозь вуэм сюрес

Кузпалъёс Каймашабаш гуртын вордскиллям. Соослэн жингрес пичи дырзы но татын ик ортчем. 1970-тӥ арысь 22-тӥ инвожоысен Катибзяновъёс парен юсьёс выллем артэ вамышъяло. Соос уж сюрессэс вордскем гуртсылы сӥзиллям.

Касимзян Катибзянович армие мынытозяз «Волга» колхозын водительын ужам. 1966-1969-тӥ аръёсы Германиын авиационной войскоосын служить карем. Вордскем палъёсаз берытскыса, азьвыл ужзэ ик азьланьтэм. 2007-тӥ арын колхозын дуриськись луыса ужаны кутскем. Татын пенсие потытозяз тыршем.

Надежда Тимиргалиевна тямыс класс бере ужаны потэм. Со кема аръёс ӵоже почтальонлэсь ужзэ нуэм. Нош 2006-тӥ арысен колхозазы пӧртэм ужъёсты быдэсъям.

Кузпалъёс уж дуразы но тыршись ужась луэменызы висъяськиллям, юртъер котыразы берганы но дыр шедьтӥллям. Кузпалъяськем беразы ик юрт ӝутыса, отчы улыны потӥллям.

Анай-атай понна бадӟым шуд – со нылпиос. Катибзяновъёслэн куинь нылъёссы асьсэ семьяосынызы уло. Соос вордскем гуртазы ӵем бертыло, анай-атайзылы юртъер котырысьтызы ужъёссэс быдэстыны юрттӥсько. Надежда апайлэн но Касимзян агайлэн сизьым внукъёссы, куинь правнукъёссы будо. Соос ӵужайзылы но ӵужатайзылы котьку юрттӥськыны дась.

Катибзяновъёс ваньмон дырзэс инкуазьлы сӥзё, шуыны луоз. Гужем узы-боры бичаны ярато, толалтэлы эмъюм турын-куар, веник дасяло, нош сӥзьыл губияны ветло. Яратонзэс, куспазы кылдэм шунытлыксэс витьтон ар ӵоже утьыса возем кузпалъёслэн улон сюрессы адӟем карымон луэ.