Нылпиосын огкыл шедьтэ, мушъёсын но нюлэсэн эшъяське

Марат Юлкубаевич ачиз но та школаез йылпумъямын. «Дышетсконме быдтыса, мувӧй поттонъя операторлы тодон-валан басьтӥ. Собере армие мынон дыр вуиз. 1983-1986-тӥ аръёсын морской флотын службаме ортчи, - вера Марат Юлкубаевич. – Нош 1987-тӥ арын школаын дышетыны кутски. Та арын ик ужме вис карытэк Удмурт кун университетэ географияя факультетэ дышетскыны пыри. Отын куать ар тодон-валан люкай».
- Нош малы та предметэз бырйиды? – тунсыкъяськисько дышетӥсьлэсь.
- Георгафияя дышетӥсьлэн Михаил Гильмияровичлэн урокъёсыз туж кельшо вал. Со ик та предметэз яратон мылкыд пыӵатӥз, луоз, - вера М. Тимирбаев.
Марат Юлкубаевич быръем удысэзъя пиналъёслы мур тодон-валан сётыны тырше, урокъёсыз тунсыко но валамон мед луозы шуыса сюлмаське. Дышетӥсьлэн верамъёсысьтыз нылпиослэн но визьнодасьсэс яратэмзы шӧдӥське. «Сельсоветэ ужаны выжыку, нылпиос бӧрдыса кылизы», - вера дышетӥсь. Зэм, Марат Тимирбаевлы школаын дышетон куспаз тямыс арлы нылпиосын люкиськоно луиз. Соку солы Бадӟым Качак гурт поселенилэн администрациеныз кивалтыны оскизы. Выль удысэ кожыса но, Марат Юлкубаевич дышетон юртсэ ӧз вунэты. Со школае газ пыртон сярысь сюлмаськиз. Со сяна, школае музей усьтонын но солэн люкетыз бадӟым. М. Тимирбаев гурт поселенилэн администрациеныз кивалтон вакытэ ик удмурт гуртъёсы - Бадӟым Качаке, Чиндэре, Качкин-Турае, Кургаке - газ вуиз. Соку тросэз чагыр эстӥськонэн пайдаяськыны кутскизы.
Марат Юлкубаевич мушъёсын но эшъяське вылэм. «Муш палэп кутыса, куамын арлэсь кема утисько ни, - вера со. – Со сяна, мон нюлэсэз туж юн яратӥсько. Толалтэ нуналлы быдэ сямен, куасъёс вылэ султыса, кыретӥ котыръяськисько». М. Тимирбаевлы нюлэс ик кужым сётэ, луоз, кылбуръёс гожъяны но. Солэн сюлмысьтыз потэм чуръёсыз «Ошмес» газетлэн бамъёсаз но инты шедьтылӥзы ни. «Ми семьяямы вить нылпи будӥмы. Ваньмы но кырӟаны яратӥськом», - вера дышетӥсь.
Марат Юлкубаевич Любовь кузпалыныз уло. Соослэн нылъёссы, быдэ вуыса, атай юртысьтызы «лобӟизы» ни. Виктория нылзы Германиын улэ, Надеждазы – Швейцариын. Нылпиоссылэн ӵем бертэмзы уг луы ке но, соос котьку витетӥ коньывуонэ атайзэс ӟечкыласа жингырто. Уго Марат Юлкубаевичлэн вордскем нуналэз Дышетӥсьлэн нуналаз тупа. Нош туэ со эшшо но вунонтэм кылёз: Марат Юлкубаевичлы 55 арес тырме. Ми но сое котырес лыдпусэныз ӟечкыласьком, азьланьын выль вормонъёс но азинсконъёс сӥзиськом.