Корказы шунытлык кузёяське

Карима апай гурт хозяйствоязы скал кыскись луыса ужамын. Пенсие потэмез бере «Инвожо» фольклор ансамбле ветлыны кутскем. Калык ансамблен кивалтӥсьлэн Ирина Шарафутдиновалэн верамезъя, Карима апай ассэ пересь ни шуыса уг улы, пе, вазисько ке, соку ик чебер удмурт дӥськутсэ дӥсяса, клубе лыктэ. Огъёзоосыныз пумиськыса вераськон но кырӟан песянайлэсь мылкыдзэ, пе, ӝуто, кужым но сёто.
Карима апайлэн ньыль нылыз но одӥг пиез. Со пичи нылыныз, Индираен, Сидор пиезлэн семьяеныз улэ. Сидор Меншарипович но Олена Шайнуровна асьсэос но пенсиын ни, но ужлэсь дугдэмын ӧвӧл на. Олена 17 ар нылпи садын пӧзьтӥськись луыса ужам. «Пичи нылпиос быризы но, садикмес ворсазы», - шуэ со. Ческыт пӧраськись кышномурт кӧня ке биржаын сылэм, бӧрысь гуртысьтызы магазинэ вузкарисе интыяськем. Со та ужаз дас ар тырше ни.
Шангараевъёслэн корказы пырыку курикен керттылэм киужъёс син азе йӧто. Олена апай ваньмон дырзэ яратоно ужезлы сӥзе. Ас киосыныз керттэм накидкаосыз дорзэс шулдырто, отын улӥсьёслы шунытсэс кузьмало. Нош кыӵе ческыт пӧраське со!
Сидор Меншариповичлэн служба аръёсыз Германиын ортчиллям. Армиын со водитель луыса ужам. Собере «Башнефтегеофизика» компаниын ужаны кутскем, котьку руль сьӧрын луэм. «Башкирилэн котькуд сэрегаз вуылӥ шуи ке, янгыш уз луы, дыр», - вера бадӟым опыто водитель. Со витьтон вить аресаз «Победа» ООО-ысь инженер-механиклэн ужысеныз пенсие потэмын.
Сидор агайлэн киосыз котьма лэсьтыны пӧрмыто. Корка пушсэс но ачиз чеберъям. Гуртоосыз, тодмоосыз но пӧртэм ужъёссы ке луо, кибашлы воргоронлы, пе, вазисько. Бугро ӵупоно-а, липет воштоно-а, Сидор агай котьма ужез интыяз вуттыса лэсьтоз. Соин со ноку ужтэк уг улы.
Шангараевъёслэн куинь нылпиоссы. Женя но Валера асьсэ семьяосынызы уло. Пичи нылзы Мальвина - анай-атаез вӧзын. Нылаш пӧраськыны, матысь адямиоссэ ческыт сиёнъёсын пумитаны яратэ.