Мед бызёз Байдӥ ошмес

Соос пӧлын БР-ысь курешъя чемпион Валентин Бадамшин (68 килограммозь), БР-ысь куасэн бызылонъя чемпионка Альфия Гарифьянова, Юматовоысь совхоз-техникумлэн волейболъя огазеям командаяз луэм Евгений Суфияров, Вуж Вараш гуртлэн волейболъя командаысьтыз одӥгез устоез шудӥсь Алексей Суфияров. Та нимъёс вӧзы ик ватсаны луэ улонзэ спортлы сӥзем пенсиысь дышетӥсез Юрий Суфияровез. Спорт, будэтэм усто спортсменъёсыз сярысь юад ке, Юрий Александровичлэн синъёсаз яркыт тылгизьыос ӝуатско кадь. Яратоно ужез сярысь со кема но трос вераны быгатэ.
«Ленинец Башкирии» газетэз лыдӟыса, егит пияш Кумертауын физкультурая дышетӥсьёсты дасяло шуыса тодэм. Соку ик солэн педучилищее дышетскыны пырон мылкыдыз пуромем. Юрий Александровичлы малпанзэ быдэстыны 500 иськем кузь сюрес но люкетымтэ. Со, школаын дышетскыкуз, средней дистанциосы бызьылонын кужмоен лыдъяськем. Училищее капчиен пырыса, бызьылонзэ куштымтэ. Ас улоназ Юрий Александрович трос дистанциосты киултэм. Солы Саппороын ортчем Олимпи шудонъёсы пыриськем Баязит Гизатуллинэн ӵош но бызьылыны кылдэм.
Нылпиослы тодон-валан сётон дуннеын Юрий Александрович 41 ар ужам. Студент дыръяз практикаоссэ Кармановской ГРЭС-лэн «Ромашка» лагераз ортчем: уяны дышетонъя инструктор луыса ужам. Диплом басьтэм ӧнерчилэн уж сюресэз ёросысьтызы Байгузино школаысен азинскем. Отын 600 дышетскись вылэм. Юрий Александровичлы кык сменаен ужано луэм. Ужаны кутскыкуз школаосын ӟеч спортзалъёс но, площадкаос но вылӥллямтэ на.
Калтасы ёросысь Качкин-Турай гуртысь Маргаритаен паръяськыса, егит кузпалъёс Вуж Варашын улыны кутскиллям. Соку отын выль школа усьтӥськем. Юрий Александрович вордскем гуртысьтыз школае вамыштэм: ДЮСШ-лэн тренерез луыса ужаны кутскем, пиналъёсты куасэн бызьылыны дышетэм. Ачиз гиря ӝутканлы трос саклык висъя вылэм. Сабантуйёсын та ӧрын солы вуисьёс ик луиллямтэ.
Тренерлы географияя, шаертодонъя урокъёсты но оскиллям. Соку ик дышетӥсь гуртсылэн азинскем сюресэныз тунсыкъяськыны кутскем. Солэн гуртэзлэн историезлы сӥзем гожъямъёсыз али но возисько.
Ю. А. Суфияров укмыс ар пенсиын ни. Озьы ке но спортэн тунсыкъяське, Калтасы ёросысь Бадӟым Качак школаысь физкультурая дышетӥсен Григорий Тимирбаевен матысь кусып возе. Аръёс ортчыса но Юрий Александрович шунытэн тодаз вае 42 кузя нылпиосын Качкин-Турае концертэн вуылэмзэс, ӵуказеяз ик Бадӟым Качакысь командаен куасэн бызьылонъя эстафета ортчытэмзэс (варашъёс вормиллям), волейбол шудэмзэс (качакъёс вормиллям). Со дырысен та кык школаосысь командаос дас куать ар ӵоже тулыс но сӥзьыл эшлыко пумиськонъёс ортчытъяллям - куспазы 64 пол ӵошатскиллям.
Юрий Александровичлэн эшшо одӥг тунсыкъяськонэз вань – со 20 арлэсь кема ини Спортивной ульчазы пумысь Байдӥ ошмесэз уте: сузя, жуг-жагъёсты бича, писпуос мерттылэ. Вылькен пылатон йылол дыръя, кылсярысь, сценарий дасяса, ужрадэ пыриськисьёсты пӧртэм заданиос быдэстыны куре. Ошмес сярысь сюлмаськыны солы Байдӥ выжыысь потэм мурт, пе, ӵектэм. Сюлмо пиосмурт пумит луымтэ. Али Юрий Александровичлэн малпаназ - ошмес котырез эшшо но чебергес но калыклы пайдаяськыны каньылгес карыса тупатон. Оскисько, малпанэз быдэсмоз.