«Вуоно арын но «Ошмес» газетэз лыдӟо»

- Газетлэсь одӥг чурзэ но лыдӟытэк уг кельтӥськы шуыны быгатӥсько. Туж кельше веросъёсты лыдӟыны. Газетын соос тросгес мед луысалзы, - вера Л. Тимирзянова. – «Ошмес» пӧртэм гуртъёсысь удмуртъёслэн улонэнызы тодматэ.

Лыдӟисьмылэн уж сюресэз гурт удысэн герӟаськемын. Со «Восток» СПК-ын ужамын. Соин ик, лэся, Лариса апайлы газет бамъёсысь гурт хозяйствоослэн ужъёсынызы герӟаськем материалъёс но кельшо. Али ке но со гурт удыслэсь кыдёкын ӧвӧл: доразы пудо вордо, муш утё. Нош кузпалыз «Колхоз Восток» СПК-ын валтӥсь агроном луэ.

- Тросэз лыдӟисьёсмы удмурт кыл воштӥськемын, валантэм луэмын шуыса ӝожтӥсько. Тӥ мар шуысалды со пумысен? – юасько Лариса апайлэсь. Нош со пумитам вазиз: «Ваньзэ валасько, вуоно арын но «Ошмес» газетэз лыдӟо. Со арняяз кык пол мед потысал».