Сандугач школалы - выль автобус

Дышетскон ар кутскон азьын Башкортостанлэн Тӧроез Радий Хабиров но Правительстволэн нврысетӥ вице-премьерез Андрей Назаров гурт школаослэн директоръёссылы 38 выль микроавтобусъёслэсь усьтонъёссэс сётӥзы. ГАЗель-Next автобусъёс луэмен, республикаысь сюрслэсь трос дышетскисьёс шуг-секытъёстэк тодон-валан басьтон юртъёсазы вуозы. Соос пӧлын - Янаул ёросысь Сандугач школаын дышетскисьёс но. Со сяна, микроавтобусъёс школаослы олимпиадаосы но спорт ӵошатсконъёсы вуылыны юрттозы.

Сандугач школаын 128 пинал тодон-валан басьтэ. Тросэз дышетскисьёс мукет гуртъёсысь ветло: татын Барабановкаысь но Рабакысь 29 нылпи дышетске, Арлянысь – вить, Норканысь – дас одӥг, Выль Киргаысь – кык, Максимысь – ньыль. «Милям школаямы ПАЗ 32053-70 маркаен кык автобусмы вал. Огез 2010-тӥ арлэн, кыкетӥез – 2013-тӥ, - вера Сандугач школалэн директорез Артём Минлибаев. – Таӵе кузьымлы – выль автобуслы - ми туж шумпотӥськом. Анай-атайёс но тау кылъёссэс верало».

Выль автобусъёсы ГЛОНАСС аппаратура но тахографъёс юнматэмын. БР-ысь Дышетонъя министерствоын ивортэмзыя, туэ школаосы автобусъёс басьтонлы республика бюджетысь 106 миллионлэсь трос коньдон висъямын. Вераны кулэ, школаослэсь автобусъёссэс выльдон «Образование» национальной проектэз быдэстыны юрттоз.

Фото:https://vk.com/school190836429?z=photo-190836429_457239018%2Falbum-190836429_0%2Frev

Фото: https://www.bashinform.ru/news/1484698-v-ufe-direktoram-38-respublikanskikh-shkol-vruchili-klyuchi-ot-avtobusov/?sphrase_id=15507902