Быръем ужез шумпотон вае

Кипчак гуртысь Игорь Салихов улмопуосыз но мукет емыш сётӥсь будосъёсыз, соосты будэтон амалъёсыз сярысь дугдытэк вераны дась. Солэн синъёсаз учкыса валаськод, макем кельше солы быръем ужез. Со мушъёс, муш утён сярысь но трос тунсыкозэ тодэ. «Ми 1993-тӥ арысен муш утиськом. Мон атайлэсь ужзэ азьланьтӥсько. Со колхозысь пасекаын мушкасьлэн юрттӥсез луыса ужаз. Мон садоводствоен но вырисько. Кыкетӥез уже мыным тужгес кельше», - вера И. Салихов. Игорь Сабирзянович мушъёссэ гужемлы кыре нуыса интыя. «Нюлэскын мушъёс каньылгес ужало. Соослы шыпытлык кулэ», - шуэ мушкась.

Сад утёнэн Игорь Сабирзянович дас арлы матэ выре ни. Солэн улмопуосыз гуртаз, ёросаз сяна, Удмуртиын, Свердловск улосвылын, Башкортостанын но будо. Со будосъёссэ, чечызэ выллем, сельскохозяйственной ярмаркаосын вуза угось.

Аръёс ӵоже Игорь Сабирзянович олокӧня сорт улмопуос будэтэм ни. «Прививать карем писпуысь улмозэ ачим сиыса адӟытэк, со сортэз вузаны уг поттӥськы. Шӧмыз ческыт ке, аслым кельшиз ке, соку гинэ мукетъёслы ӵектӥсько, - вера сад будэтӥсь – Мерттоно будосъёсты – улмопу, груша, слива, крыжовник - почта пыр заказэн но басьтӥсько, питомникъёсы но ветлӥсько». Берло аръёсы И. Салихов одӥг выжые кык-куинь пӧртэм сортъёсты прививать карыны кутскем. Со вера:

- Городын улӥсьёслэсь куронъёссэс лыдэ басьтӥсько. Соослэн дачаосазы интыоссы пичи. Куинь выжы писпу мерттытозязы, одӥг выжыысь куинь сорт улмо сиё. Одӥгез сорт, кылсярысь, вазьгес вуэ, мукетыз бер сӥзьыл гинэ кисьма.

Муш утись ачиз но муш кадь ужа. Салиховъёслэн бадӟым садазы кыӵе гинэ писпуоссы ӧвӧл. Соосты утялтытэк, писпуос, будосъёс емыш уз сётэ. «Боярышник борды прививать карем грушаез куинь ар ини милемыз шумпоттэ. Узыр емышъёссэ писпулэн вайёсыз но уг вормо», - пиезлэн ужез сярысь вера Мария Алексеевна.

Салиховъёслэн садазы будӥсь крыжовникез мон но оскалтӥ. Та дырозь мынам сыӵе ческыт, бадӟым емышо крыжовник сиеме ӧй вал на.

Пермь шаерысь Куеда ёрос.

Туспуктэмъёсыз Алексей Самирзяновлэн.