Сюрес нуэ Германие

- Та пумысен серекъяса вераськиськом вал. Но зэмзэ кунгож сьӧры улыны мыном шуыса, огпол но уг малпаськы вал.

- Малы Германиез бырйиды?

- Ӟуч сямен вераса, стечение обстоятельств шуод-а? Германия - сыӵе шаер, кытын кунгож сьӧрысь ужасьёс кулэ. Кузпалы татчы азьвылгес вуиз. Уже интыяськон солы капчиен ӧз сётӥськы. Ӝыны ар пала дыр ортчиз. Трос документъёс дасяно вал, Германиялась согласие возьмано луиз. Вераны кулэ, таяз арысен уже интыяськон кӧня ке капчиятэмын, табере рабочей профессиен но уж шедьтыны луэ.

- Татын урамъёсын нӧд ӧвӧл: тулыс но, сӥзьыл но. Со паймымон луиз. Котырак чылкыт ке но, интыен-интыен куям жуг-жагъёсты адӟыны луэ. Татын калык туж вазиськись, адямиос котьку пальпото. Подъездысь бускельёс пумиськыку ӟечбуръясько, тонэ уг ке но тодо. Магазинъёсын но озьы ик. Писпуослэн трос луэмзылы пайми на (Ижевскын, кылсярысь, Берлинэн ӵошатӥд ке, писпуос туж ӧжыт). Татын паркъёс туж трос. Оын ӟичыос, лудкечъёс, кабанъёс, барсукъёс уло. Ӟичыос, нокыӵе кариськытэк, урамъёсын бызьыло. Берлинын ӝужыт (высотной) зданиос ӧвӧл.