ВУ ДУРЫН ТАЗАЛЫКЕД СЯРЫСЬ ЭН ВУНЭТЫ

Курыт юонлэн улонлы кышкытлык кылдытэмез сярысь тросэз тодо ке но, шутэтскыны мыныкузы сое сьӧразы куто. Туэ но ву дурын бырисьёс ӧжыт ӧй вал ни, соос пӧлысь кӧняез ке кудӟемын вылэм. Тросэз юэмъёс малпало, пыд йылазы оскымон сылыны быгато ке, вуын но уяны кужымзы тырмоз на шуыса. Та ласянь соос юн янгышало. Син азяды пуктэ таӵе суредэз: вить сантиметр диаметрен трубаетӥ ву бызе. Одӥг вакытэ солэн диаметрез 10 сантеметрозь будӥз, собере куинь сантиметрозь усиз. Шӧдтэк шорысь трубалэн тужгес ляб интыез пилиськиз. Юэм адямиез но таӵе ик кышкыт суред вите. Со юиз ке, вирсэръёсыз паськытало, вуэ пыриз ке, сюбегало. Адямилэн тужгес ляб вирсэръёсыз сюлэмаз ке, та вакытэ сое инфаркт кутыны быгатоз, йыраз ке – инсульт.

Температуралэн шӧдтэк шорысь воштӥськемез юымтэ адямилы но кышкыт. Соин Кышкытлыкен нюръяськонъя кун комитетысь ӧнерчиос ӵекто: вуэ нырысь пигесозь пыроно, собере кускозь. Мугорез кезьыт вуэн гылтэм бере гинэ быдэсак зымыны яра. Со сярысь тужгес малпаськоно вирзӥбетэнызы курадӟисьёслы.

Берло аръёсы тросэз пыласькыны бадӟымесь надувной матрасъёсын ветло. Солэн бордаз ву пырыны уг яра шуыса гожтэмын ке но, солы нокин саклык уг висъя. Эн вунэтэ, таӵе матрасъёс палаткаосын шутэтскон понна малпамын. Соос вылын кӧлыны туж каньыл, нош уяны – кышкыт. Озьы ке но та выллем матрасъёсын ву дуре мыныны дӥсьтӥды ке, тодэ: ярдурлэсь 20-30 метрлы кыдёке кошконо ӧвӧл, ву 1,5 мертлэсь мур медаз луы.

Нылпиос анай-атайзылэн чакламтэенызы вуын быро. Бадӟымъёс юыса, шашлык сиыса яке кырӟаса пукыкузы пиналъёссы сярысь вунэто. Вераны кулэ, ву дурын котькуд пинал бордысь аслэсьтыд нылпидэ адӟыны быгатоно. Котькин кышкыт учыре шедьыны быгатэ, со ласянь тӥляд нылды яке пиды но пӧртэм ӧвӧл. Солы но, оло, куке юрттэт кулэ луоз.

Ву дуре вуылыкузы, пиналъёс юрттэт курыса шудыны ярато. Адямиослэсь вӧзазы бызьыса лыктэмзэс адӟыса, соос шумпото. Та вакытэ уг малпало, зэмзэ юрттэт кулэ луиз ке, вӧзазы нокин уз лыкты ни шуыса. Соослэсь юрттэт куремзэс шудэмен лыдъялозы. Соин нылпиосты таӵе шудонъёссылэсь, пӧяськон сямъёссылэсь алыны тыршоно. Нош асьтэлы нылпиосын шутэтскыкуды котьку сак кариськоно. Эн вунэтэ: азьланяз шутэтскыны вутскоды на, нош пиналдылэсь улонзэ уд берыктэ ни. Со сярысь тужгес юн малпаськоно город сьӧрын яке нимысьтыз пыласькыны чаклам интыослэсь палэнын шутэтскыкуды. Зэм, отын тӥледлы шутэтскыны нокин уз люкеты. Озьыен, шуге-леке шедьыкуды но нокин уз юртты, тазалыкты асьтэ киын луоз.

Вуэ выем адямилы юрттыны быгатоно. Янгышады ке, кык муртлэн улонэз понна нюръяськоно луоз. Кылсярысь,выись адями доры бертӥз лыктыса гадь ултӥз кутӥськоно, собере сое шур дуре нуыны тыршоно. Нош умойгес луоз, сьӧрады спасательной круг ке басьтӥды. Зэм, со котьку ки улын уз луы.

Яр дуре поттэм адямиды уг шока ке, ӝоггес нырысетӥ юрттэт возьматыны тырше. Со понна тӥледлы туж ӧжыт дыр сётӥське. Юрттэм адямиез матысь кӧня ке дыр ӵоже пыд йылаз султыны лэзёно ӧвӧл – солэн тыаз вуэз луыны быгатоз на. Солэсь тазалыксэ эмчиос учкыны кулэ. Нош кузпал, нылпиос, эшъёс чидалозы на.