"Мынам семьяе - мынам данъяськонэ"

Кузпалъёс дас тямысэтӥ арзэ ни улон сюрестӥ ӵошен вамышто. Нош эшъяськонзы дышетскон аръёсысенызы ик кутскем. «Гуртамы ньылетӥ классозь дышетским. Собере тодон-валан басьтыны Бадӟым Качак школае ветлыны кутским. Соку али выллем автобусъёс ӧй вал. Соин котькуд нунал вить иськемез пыдын ортчылӥм. Ми, дэмен пиналъёс, быдэс сюресэз шудыса но кырӟаса ветлӥм. Куатаськон дыръёсмы но луылӥз. Та вакытэ ик, луоз, Артём монэ синйылтэм. Соку кисыын нуллон телефонъёсмы ӧй вал бере, со мыным эшъёсы сьӧры запискаос лэзьылӥз. Артёмен ми куинь ар эшъяським», - вера Валентина.

Егитъёс кузпалъяськыса вордӥськем гуртазы ик интыяськыны мылкыд каризы. Выль юрт пуктыса, 2015-тӥ арын отчы улыны выжизы. Валентина Красный Холмын парикмахерын тырше. «Адямиосын ужаны кельше, куд-ог дыръя жадисько ке но», - шуэ со. Валентина дораз но яратоно ужезлэсь уг люкиськы. Гуртоосызлэсь йырсизэс тупатэ. Со сяна, Валентина топиарийёс лэсьтыны, керттӥськыны яратэ. Пӧрам-пыжиськемъёсыз но удалто. Анайзылэсь нылъёсыз но адӟем каро. «Валерия но Эдита интернетысь рецептъёсъя печенняос, пӧртэм пӧръёс пыжо, - вера Валентина. – Со сяна, Валериямы гижыосты тупатонэн выре, Эдитамы суредаськыны, кырӟаны-эктыны яратэ. Пичиезлы Зарина нылмылы кык арес. Со аслаз выросъёсыныз, вераськеменыз ваньмес бордаз кыске».
Валентина Галиевналэн Артём кузпалыз Удмурт Элькунын мувӧй поттӥсьёс дорын вахта амалэн дас арлы матэ ужа ни. Шутэтскон нуналъёсаз юрт котыраз берга, трактореныз гуртоосызлы бакча гырыны, турын турнаны но мукет ужъёсты быдэстыны юрттэ. Кузпалъёс ужаны гинэ ӧвӧл, шутэтскыны но дыр шедьто. «Каникулъёс дыръя ӵошен Ижевске зоопарке, цирке, Уфае аквапарке, Бурае бассейнэ, инкуазе шутэтскыны потаськом», - вера Валентина.
Кузпалъёс ёросазы ялӥськем «Самое красивое подворье» конкурсэ пыриськиллям. Отын соослэсь юртъер котырзэс кыкетӥ интыен дунъяллям. Таӵе вормон огъя кужымен, семьяын тупаса улэмен гинэ басьтыны луэ, дыр.
- Тӥ понна ма со семья? – юасько Валентиналэсь.
- Азьло та юанлы таӵе валэктон сётысал: со - ог-огмес яратыса валче улон. Нош али ватсасал: мынам семьяе – мынам данъяськонэ. Улонме гажано анай-атайёсытэк, муспотон нылъёсытэк, яратоно кузпалытэк син азям уг пуктӥськы, - вера Валентина. - Мон асме шудоен лыдъясько. Соин таӵе семья кылдытэммы пумысен чик уг жаляськы.