"Кагаз газет но вотэс бамъёсысь иворъёс ӵошен мед вамыштозы"

- Республикаямы потӥсь газетъёслэн 30 процентэз «Республика Башкортостан» Издательской домлэн контентэз луэ. Асьмелэн, шумпотыса верано, тросэз лыдӟисьёсмы газет-журналэз киязы кутыса учкыны мылкыд каро. Соос газет-журналъёсмы борды кык-куинь пол берытскыло: нырысь учкыса пото, собере лыдӟо. Калыкмы кагаз газетъёслы кемалась дырысен ни оске. Адямиос тодо, кагазэ гожтэмез уд ӵушы, уд быдты шуыса. Отын ваньмыз шонер луыны кулэ. Нош интернетысь иворъёсты олокӧня пол воштыны луэ.

- Издательской домлэн газет-журналъёсызлэн лыдӟисьёсыз пӧртэмесь: нылпиос, егитъёс, нылкышноос но пиосмуртъёс, дышетӥсьёс но гурт удысын тыршисьёс. Ми туала технологиослэсь но бере кыльыны ум тыршиське. Со понна «Электронное издательство» проект кылдытэмын. Со 152 газет-журналъёсмылэсь сайтъёссэс огазея. Таӵе проект милемлы лыдӟисьёсмылэсь куронъёсссэс эскерыны юрттэ.

- Милям контентмы ӟуч но Башкортостанысь вить пӧртэм калыкъёслэн кылъёсынызы потэ. Национальной СМИ-ос ӟуч кылын-потӥсь газет-журналъёслэсь номырин уг висъясько. Соослэн ужпумзы гинэ бадӟым – республикаысьтымы ӧжыт лыдъем калыкъёслэсь кылзэс утён. Туала вакытэ, куке егитъёсмы анай кылзылэсь палэнтӥсько, соослы котькуд лыдӟисьсы понна нюръяськоно луэ.

- Информационной технологиос газетлы гожтӥськон удысамы но вуизы. 2016-тӥ арысен предприятиямы газет-журналъёслы гожтӥськон понна интернет-магазин ужа. Со пыр гожтӥськисьёслэн лыдзы арысь аре будэ. Озьы ке но сокем шумпотымон ӧвӧл. Интернетын тросгес егитъёс пуко. Нош асьмелэн лыдӟисьёсмы, кызьы верай вал ини вылӥын, арлыдоосгес. Соин пандемия вакытэ егитъёслы анай-атайёссылы, песяй-песятайёссылы яратоно газетсылы гожтӥськонэн юрттыны курыса вазиськимы.

- Мон малпасько, кагаз газет-журналъёсты лыдӟисьёс азьланяз но луозы. Соин валтӥсь газетъёсмылэн кагаз версизы утиськоз. Тиражъёс кулэсмозы. Куд-ог газетъёслэн сайтсы гинэ кылёз. Газет-журналъёслы гожтӥськон дунъёс будозы. Озьы ке но соосты лыдӟисьёс луозы на. Та удысын тыршисьёслы азьланяз интернетын паськытгес ужаны дышетсконо. Соин азьланезлы ужпум: выль технологиос сьӧры вамыштыса, вужез сярысь вунэтоно ӧвӧл. Кагаз газет но вотэс бамъёсысь иворъёс ӵошен мед вамыштозы.

Туспуктэм: "Молодёжная газеталэн" сайтысьтыз басьтэмын.