Книга газетмылэн историяз вуттэ

«Айгуль – Толэзь сяська» книга Удмуртиысь азербайджанъёслэн «Достлуг» огазеяськонзылэн кивалтӥсезлэн Зульфигар Рагим оглы Мирзаевлэн (татын но шаерысьтымы пӧртэм калыкъёслэн эшъяськемзы шӧдӥське) но Удмурт Элькунысь Кун Кенешлэн депутатэзлэн Татьяна Витальевна Ишматовалэн юрттэтэнызы поттэмын. Отчы Ульфат Шайхутдиновичлэн кузьмадёсэз, веросъёсыз, новеллаосыз, очеркъёсыз но интервьюосыз пыремын.

Лыдӟиськонме веросъёс, новеллаос бордысен кутски. Книгае, кылсярысь, «Шӧдон», «Кузь нунал», «Кучыран» веросъёс, «Выжы», «Пересь…мон», «Укно – нимы мынам» новеллаос пыремын. «Тон доры мон кыз доры шуыса лыктӥсько вал, - мӧзмыт куараен вазиськиз покчи писпулы нюлэсчи. – Нош тынад кыз луэмед уг поты, шӧдске. Тодӥськод-а, уд-а – выжыез уд вошты. Тынад но выжыед - азьвылэз ик. Мугор пушкытӥд али но кызлэн сурсвуэз-вирез ветлэ. Тӥни вайёсад выль лысъёс потыны кутскиллям ни». «Выжы» новеллаысь таӵе чуръёсты лыдӟыса, син азям пуктӥ городын улӥсь удмурт калыкмес. Соос пӧлысь тросэз ӟучомыны тыршо ке но, мугортӥзы удмурт калыклэн вирез бызе. Озьыен, автор кызьпуос пӧлын будӥсь одӥг кыз пыр асьмеды яркыт возьматыны быгатэм. Со котькуд новеллаяз но веросаз туала улонысь учыръёс пыр геройёсызлэсь дунне шоры учконзэс, тунсыко малпанъёссэс, ог-огенызы кусыпъёссэс суреда.

Книгалэн очеркъёслы, интервьюослы сӥзем люкетаз выжыса, трос тодмо нимъёсты пумитай. Соос пӧлысь тросэныз мон «Ошмес» газетлэн бамъёсыз пыр тодмо ни вал. Автор пӧртэм аръёсы гожтэм чуръёссэ редакциямы келялляз. Озьы ке но мон отысь котькуд героез ас поннам выльысь усьтӥ кадь. Дырын-дырын «Ошмес» газетлэн историяз но берытсконо луылӥз. Малы ке шуоно книгаысь куд-ог геройёслэн улонзы но ужзы республикаысьтымы удмуртъёсын, газетэн но герӟаськемын. «Веросчи, шаерчи, журналист» очерказ автор Башкортостанысь культура удысысь дано ужасен, «Ошмес» газетлэн нырысетӥ редактореныз Андрей Васильевич Гильмаевен тодматэ. Мукетызлэн геройлэн ужез гурт удыслы ке но сӥземын луиз, солэн сюлмыз удмурт калык понна ӝуа. «Дэмен» - со кужым» интервьюлэн героез – Р. Б. Галямшин. Автор Ренат Биктимировичен 1998-тӥ арын вераськем. Соку БР-ысь удмуртъёслэн НКЦ-енызы кивалтӥсь удмурт кылын газет поттон сярысь сюлмаськемзэс вераз. Вуоно араз кивалтӥсьлэн малпанэз быдэсмиз.

Книгаысь БР-ысь гурт удысысь дано ужасен Ханиф Баймиевен интервьюез, кырӟась Людмила Ахтариева, профессор Пётр Шараев, ожысь но ужысь ветеран Мухаматхан Гарифуллин, журналист Валерий Нуриахметов, журналист но писатель Рашит Хайдаров, Удмурт Элькунысь гурт удысъя министерствоен кивалтэм Сайфутдин Шартдинов сярысь очеркъёсты лыдӟыны луэ. Та адямиослэн улон сюрессы пӧртэм удысъёсын ке но герӟаськемын, огазея одӥгез: соос - Башкортостанысь удмуртъёс. Та люкетын бадӟым инты висъяське авторлэн Бурай ёросысь Байшадыын улӥсь Рафит Миннекузинэн гожтэт пыр вераськонзылы. Отын быдэс шаерысьтымы гуртъёслэн адӟонзы шӧдӥське.

Лыдӟиськонме «Айгуль – Толэзь сяська» кузьмадёсэн йылпумъяй. Озьыен, книгаез берысеныз лыдӟыны кутски. Мон понна тужгес тунсыко люкетсэ берлолы кельтӥ. Кузьмадёсэз кылем арын газетамы но печатламы вал. Зэм, автор соку лыдӟисьёсты солэн пичи люкетэныз гинэ тодматӥз. Соин кузьмадёслэн пуштросэзъя трос юанъёс кылдӥзы. Табере соослы котькудӥзлы валэктон шедьтӥ. Книгаез егитъёс лыдӟысалзы ке, улоназы, оло, трос янгышъёслэсь утиськыны быгатысалзы.

Ольга НИГАМАТУЛЛИНА.