-5 °С
Лымы
Вань иворъёс
Общество
24 Июне 2020, 15:10
Кизганбаш гуртэн тодматэ "Удмурт дунне" газет
2000-тӥ арын нырысьсэ Балтач ёросысь Кизганбаше командировкае вуылӥ. Сюресэ сокем кузь луыны кулэ ӧй вал ке но, йыромыса-йыромыса отчы туж кема мынӥ. Берло валэктӥзы, мон янгыш сюресэтӥ вуиськем шуыса. Кин ке но вераз вал, Кизганбаше Уфа трассаысен пыроно шуыса. Нош гуртэ мукет сюрес вуттэ вылэм. Бертыку но ӧз удалты, бадӟым но ӟеч сюресэтӥ кошкимы ке но. Табере мотоциклмы тӥяськиз... Огез понна шумпотоно: газет бамъёсамы Кизганбаш но отын улӥсь калык сярысь трос материал дасяны пӧрмытӥмы. Нош татын мон тужгес пайми гурт котырын трос тыос луэмлы. Балтач ёросысь Кизганбашысь лыдӟисьёсмы доры берло но кӧня ке пол вуылыны кылдӥз на. Нош 2018-тӥ арын отын улӥсьёсын тодматӥз Нефтекамскысь Лиза Тимуршина. Со Кизганбашын вордскыса будэмын. Нош али "Удмурт дунне" газетын потэм "Башкириысь Кӧйгурт: Хазыр мунчо но уг пукто индэ" материалэн тодматэме потэ. Авторез - Елена Рябина.
Нош куке но гуртсы ӟамны вал
Башкириысь Балтач ёрослэн пӧртэм сэрегъёсаз 3 удмурт гуртъёс интыяськемын: Асавка, Шавьяды но Кизганбашево. Берлоез 3 ёросъёс куспын сылэ: огпалаз — Мишка ёрос, мукет палаз — Бурай.
Кайгу вылэ кайгу
Та гуртысен ёрос центрозь — Балтачозь — 35 иськем мыноно, Бурае иськемлы гинэ тросгес — 36 иськем, Нефтекамскозь — 130, Уфаозь — 180 иськем.
Кизганбашеволэн 2 удмурт нимъёсыз: Кӧйгурт (тазэ ӵемгес верало) но Кӧльыгурт. Гурт калык верамъя, удмуртъёс отчы 1700-тӥ аръёсы Удмуртиысь вуиллям. Соослы та палъёсы музъем сётӥллям. Нюлэсъёсыз кораса но сузяса, удмуртъёс гурт кылдытӥллям, музъем бордын ужаллям, пудо вордӥллям. Дыр ортчемъя Кӧйгурт будэм. Отчы мукет выжы калыкъёс но вуылӥллям: ӟучъёс, бигеръёс, поръёс. Ас вакытаз со быдэс волостьлэн центрез вылэм!
Озьы бере, отын ортчы-лӥллям бадӟым ужрадъёс, учыръёс. Кылсярысь, Граждан ож вакытэ Кизганбашевое матысь ёросъёсысь но гуртъёсысь гордъёс люкаськиллям. Бӧрысь тӧдьыос вуиллям но трос гинэ калыкез быдтӥллям (со учыр гуртлэн историяз «кулакъёслэн восстанизы» нимын кылемын, со сярысь веранъёс семьяысь семьяе, ымысь ыме выжо). Шыпыт луэм бере гуртын улӥсьёс вань шӧйёсты гурт пумысь нюке согиллям — озьы кылдэм вынлыко шайгу. Туннэ со кенерамын. Кӧня мурт отчы ватэмын — тодӥсь ӧвӧл.
— Ӵужай вера вал: урамын, пе, озьы но, тазьы но кулэмъёс
кыллё, уробоен, пе, валэн — тӧдьы-а, горд-а — бытынзэс (ваньзэс) гуэ кисьтазы, — тодаз вае Кӧйгуртын улӥсь Валентина Багаутдинова. — Ми горд луиськом ке, тӧдьыос лыктӥллям индэ (ни) озьы. Урамын кин гинэ вылэм — уаньзэс (ваньзэс) виыса мынӥллям.
кыллё, уробоен, пе, валэн — тӧдьы-а, горд-а — бытынзэс (ваньзэс) гуэ кисьтазы, — тодаз вае Кӧйгуртын улӥсь Валентина Багаутдинова. — Ми горд луиськом ке, тӧдьыос лыктӥллям индэ (ни) озьы. Урамын кин гинэ вылэм — уаньзэс (ваньзэс) виыса мынӥллям.
Восстание бере ог 2 ар ортчыса, гурт эшшо одӥг бадӟым кайгуэз адӟиз.
— 1920-тӥ аръёсы гурт копакыз ӝуам, одӥг урам кылем — Тугай урам сое шуиськом, — вера Рамир Шайнуров. — Милям семьямылэн соку валэз вылэм. Тыл потэм бере уробое мае вуттӥллям тырыса — потто вылэм, но вал тылэз адӟем но кышкаса пегӟем, нош тырмытэм уробо ӝуам. Озьы, мар вылазы дӥсямын вылэм — соин кылиллям.
Кӧйгуртын улӥсьёс тодо гуртсылэсь историзэ ӵыжы-выжыоссы верамъя: кин кытчы кошкем, кин кин понна ожмаськем, ку бырем.
Быремъёсыз семьяен-семьяен буре ваё, вынлыко шайгу доры сяська поныны ветло, ӟеч улон курыса, вӧсясько.
Быремъёсыз семьяен-семьяен буре ваё, вынлыко шайгу доры сяська поныны ветло, ӟеч улон курыса, вӧсясько.
— Удмуртъёслэн куалаоссы уань, — вера В. Багаутдинова. — Вить-а, куать-а куала уань вал гуртын пичи дыръямы. Али отын уг ни вӧсясько. Соос кенерамын, отчы пырись ӧвӧл, дыр, индэ. Араз огпол, июне, ӟег сяськаяку, быдэс гуртэн болеге (нюлэс) вӧсяськыны ветлӥськом.
Со сяна, дорын вӧсяськиськом Быдӟынналэ (Паска), со бере арня ортчыса — кисьтон нуналэ, 7-тӥ ноябрьын нош кисьтон луэ. Соку шайвылэ ум мынӥське, шайвылэ эттэ (ӵемысь, котьку) мынӥськом 9-тӥ мае но нылпиос бертон вакытэ.
Со сяна, дорын вӧсяськиськом Быдӟынналэ (Паска), со бере арня ортчыса — кисьтон нуналэ, 7-тӥ ноябрьын нош кисьтон луэ. Соку шайвылэ ум мынӥське, шайвылэ эттэ (ӵемысь, котьку) мынӥськом 9-тӥ мае но нылпиос бертон вакытэ.
Кин кытын уке
Туннэ Кӧйгуртын 138 адями лыдъяське ке но, ваньзы отын уг уло, кин ке толйыны мукет азе кошке. Куштӥськем коркаос трос кылемын. Уноез адямиос пенсиын ини яке пенсие потыны дасясько.
— Гуртын 45 коркаос чокласько (лыдъясько), уаньмаз уг уло, абиос (песяйёс) тол потыны кошко, — вера Валентина Багаутдинова.
Кылдон аръёсаз сямен ик, Кӧльыгуртын нош ик удмуртъёсгес кылемын.
— Бигеръёс ӧжыт кылизы хазыр (али), соос но данакез удмуртэн верасько индэ, — шуэ Р. Шайнуров. — Ми будыку, гурт ӟамны (бордаз кыскись) вал. Милям азьло школа бадӟым вылэм татын. Мукет районъёсысь но ветлӥллям — татын, пе, ӟучен укытӥллям (дышетӥллям), а отӥ бигер сямен уко (дышетско) вал. Школаын «а», «б», «в» классъёс но луыло вылэм. Ми дыръяку одӥг классэн гинэ на вал. Школаез пуэн эсто вал. Собере укисьёс (дышетскисьёс) кемизы (кулэсмизы), бырылӥзы. Начальной класс кылиз но — гуртамы Пашка ӟырт (юрт) уань — отчы кӧчылӥзы (выжизы) индэ. Нош вуж школаез ворсазы, музей каризы.
Табере Пашка юртын (куке но со Кизганбашысь узыр купецлэн коркаез вылэм) но школа ӧвӧл ни, пичиос кин кытын дышетско.
— Али огезлэн корышелэн (бускель) нылпиосыз школае нуналлы быдэ автобусэн Карыше укыны ветло, мукетызлэн корышелэн Бурайын уко, интернатын уло, — азьланьтэ Р. Шайнуров. — Верало, 11-тӥ классозь ӧжытэз кыле, пе, тыршо 9-тӥ бере кытчы ке укыны пырыны.
Школа гинэ ӧвӧл, гуртын быриз ужан интызы но — колхоз.
— Каникулэ потыку, ми, куаныса, бызьылыса турым, сенаж октыса, ветлэм вал колхозын, — азьланьтэ Р. Шайнуров. — Ӧжыт ке но копейка сёто вал. Кызык (тунсыко) ведь! Адями но, пудо но данак вал. 2002-тӥ арын колхоз быриз, сое Уфаысь фермер басьтӥз, пудоез быдтӥз. Ужам понна уксё ӧз тулля (ӧз тыры). Хазыр уг кизё индэ, колхоз луымтэ бере. Адямиос татысь, ужзэс куштыса, кошкизы но корыш гуртэ ужаны пыризы — кудӥз Зилязекулевоын, кудӥз Начаровоын ужа.
— Нылпиос милям Уфаын куинез но, — шуэ В. Багаутдинова. — Кин ке Нефтекамске кошке, кин ке Свердловске (Екатеринбурге). Кинлэн туганэз (ӵыжы-выжыез) кытынгес. Тани мынам апае Уфаын бере — отчы кошкизы. Гуртын ма уж уань? Огмар (номыр) но ум ужаське. Фермаын 4-5 адями ужа индэ. Одӥг частной лавка, медпункт, клуб уань.
— Пиналъёс ӧвӧл ни хазыр, корка уг вутто. Трос виль (выль) корка пуктылӥзы, веме ортчытыса, колхоз вакытэ, 1980-тӥ аръёсы, куке мон ужаны башлай (кутски) вал, — шуэ Р. Шайнуров. — Хазыр мунчо но уг пукто индэ.
Туспуктэмъёсыз Елена Рябиналэн.
Читайте нас:
Учредитель: Агентство по печати и средствам массовой информации Республики Башкортостан
Регистрационный номер: Свидетельство ПИ № ТУ02-01536 от 6 июня 2016г.
Главный редактор: Нигаматуллина Оля Борисовна
Газета "Ошмес" - общественно-политическая, социальная, культурно-просветительская газета удмуртов Республики Башкортостан.
Телефон
Телефон+7 (34778) 2-11-89, 2-18-71
Электронная почта
Адрес
452830, Республика Башкортостан, Татышлинский район, с. Верхние Татышлы, ул. Ленина, д. 91