Семьяязы - шуныт, сюлмазы - пӧсь

Нош та гуртэ вуыса выжы лэзьытозяз, Лена апаез улон кытчы гинэ нуыса вуттымтэ. Вордскемын со Балтач ёросысь Асавка гуртын. Ньыль арес дыръяз семьязы Казахстанэ, Караганда городэ улыны кошке. Нырысетӥ классэ пичи ныл Карелиын мынэ. Берен Асавкае берытскемысьтызы, кыкетӥ классэ отысь школае вамыштэ, нош куинетӥын дышетске пуэн ужан Майск нимаськись участокын. Со Татышлы ёросысь Асавды, Балтач ёросысь Тибелёво гуртъёслы матын вылэм. Лесхозлэн участоказ школазы, клубзы, магазинзы вылэм. Ужасьёс кык квартираё коркаосын улӥллям. Нылашлэн школаысь школае ветлонэз таин уг йылпумъяськы на. Атаезлэн ужан интыосыз вошъяськемен, со ог арзэ 57-тӥ участокысь школаын, нош 5-8-тӥ классъёссэ Кардон-Арибашын дышетсконо луэ.
Визьнодаськон юртъёсыз пӧртэм ке но луизы, Лена умой тодон-валан басьтытэк ӧз кыльы, тужгес яратӥз точной наукаосыз. Тямыс классэ йылпумъям нылашлэн бухгалтерлы дышетскыны мынэмез потэ вылэм, нош завучсы ӵектэм стороитель‑каменщиклэсь специальностьсэ басьтыны. Стерлитамакысь строительной училищеын одӥг ар дышетскемез, каникулъёсы Татышлы пала бертылэмез сярысь Лена Сафиуллиновна ӝожомыса вера, малы меда сыӵе кыдёке дышетскыны мынӥ шуыса. Соку рос-прос сюресъёс но ӧй вал ай уго, праздникъёсы бертыны быгатытэк, берен Стерлитамаке кошкемез но луылэм. Ог ар дышетскыса, егит ныл Уфае уже интыяське, ӝыт школаын шор ёзо тодон-валан басьтэ, собере бухгалтерлы дышетске на. Гажанэныз семья кылдытыса, Кардонысь лесхозлэн контораяз со 35 ар бухгалтер луыса тыршем.
Пинал дыръяз трос шуг-секыт адӟем Ринат Фархуллович шаплы но вераськыны яратӥсь Лена Сафиуллиновна вӧзын каллен но шыпыт адске. Озьы ик кулэ, дыр, ӟеч кусыпъёслы: кин ке кылзыны кулэ, кин ке - вераны. Ог-огзылы соос туж умой тупало. Ӵош улэмзылы туэ 48 ар луоз ини.
Ринат агайлэн но ужан сюресэз лесхозэн герӟаськемын. Нюлэскы ужасьёсты нуллон сяна, кытчы гинэ уг вутты вал сое уж сюресэз. Призывникъёсты нуоно-а, экскурсиен Уфае цирке яке мукет интыосы мыноно-а, кыӵе ке празднике-а – ужед сыӵе бере, нуиськод но берен ваиськод. Нылпиос понна кыл кутон водитель понна тужгес секытэз вал, дыр. «Песятае ас вакытаз туж кулэ адями вал», - шуэ парез Лена апай но.
Кык нылпи будэтӥзы Ахмадуллинъёс. Та нуналэ соослэн ньыль внукъёссы, правнуксы вань. Нылпиоссы юрттӥсько мӧйымем анай-атайзылы, гурт котырын уж тырмыт шеде уго. Улон шоры серем пыр учкись Лена апай пудо утемзы сярысь серекъяса но бухгалтер сямен лыдъяса-чотаса вера: «Парсь утиськом фарш понна, ӵӧж утиськом, малы ке шуоно шыд лым яратӥськом, кеч утиськом йӧлыз понна».
Анна БАЙДУЛЛИНА.
Татышлы ёрос.