Астэ гинэ эн малпа, мукетъёсты но тодад возьы

Кышномурт туж жадьыса бертэ ке но, пумитаз шедись тодмоосызлы коньдонзэ шыръямез сярысь вераны кужым шедьтэ на. Туала вакытэ таӵе суредэз ӵемысь пумитаны луэ. Соин куддыр магазинъёстӥ ветлыны ик шурдыт. Тон азьын, оло, висись адями дӥськутэз дӥсяса адӟылэм? Яке висись адями нянез кутылэм? Зэмзэ ик кышкыт. Со пумысен юнгес малпаськоно луиз шаерамы коронавирус вӧлмыны кутскем бере. Нырысь нуналъёсы дӥськут магазинъёс но ӧз ворсаське угось. Нош табере соос ваньзы сямен усьтӥськемын ни. Коронавирус быремын ӧвӧл ке но.
Куартолэзе одӥгез тодмое жингыртэ. Со магазинэ няньлы потам. Отын кышномуртэз пумитам. Со одӥг нянь басьтон понна дассэ киосыныз кутыса адӟем. Огез, пе, чурыт, мукетыз ӝуам, нош куинетӥез воксё пыжымтэ. Тодмое кема сылэм кышномуртлэсь бырйиськемзэ учкыса. Берло со валэктыны тыршем, магазинын нянез озьы эскерон чебер ӧвӧл шуыса. Нош кышномурт солэн пумитаз урмем пуны сямен «утыны» кутскем. Та вакытэ тодмоелэсь сюлэмзэ венен бышкалтӥллям кадь. Со берло аръёсы адямиослэн ог-огзэс гажан сямзы быремын шуыса тодэ ке но, котьку ӟечезлы осконэн улэ вал. «Аръёс ортчыса, нылпиосмы гинэ вань уродзэ тодамы медаз вайытэ», - шуэ со.
Тодмое алигес выльысь жингыртӥз. «Мынэсьтым мылкыдме кивалтӥсьёсмы но шӧдо», - вера со. Республикаысьтымы вуз каронъя но басьяськисьёслэсь правооссэс утёнъя кун комитет вуз карон центръёслы но магазинъёслы выль куронъёсын приказ кутэм. Табере басьяськисьёс дӥськутсэс магазинын мертаны уз быгатэ ни. Зэм, воштӥськонъёс кемалы ӧвӧл – коронавирусэн герӟаськем югдур тупатскиз ке, ваньмыз ас ӧраз выжоз. Озьыен, калыклы вунэтоно ӧвӧл: коронавирус - дунне вылысь трос пӧртэм алясь висёнъёс пӧлысь одӥгез. Соин асьмелэн тазалыкмы сярысь гинэ малпано ӧвӧл, мукетъёсты но тодамы возёно. Одӥг нянь понна малы дассэ кутыса адӟоно? Нош малы бадӟым мугорад 46-тӥ размерен дэремез кыскыны тыршоно? Дӥськутэз, сиён-юонэз куддыр синъёсын но мертаны-дунъяны луэ.
Олеся САДЫКОВА.

Туспуктэм интернетысь басьтэмын.