Вить сю манет быдэс улонзэ воштӥз

Янаулысь Сергей Лавров мотоциклъёс лэсьтылэ. Мотоциклъёслы со пичи дырысеныз синмаськемын. «Мыным дас куинь арес вал. Арсен эше мопедзэ вузаны малпам. Нырысь ик мыным ӵектӥз. Уй но нунал мопед басьтон малпанэн улӥ, но коньдонэ ӧз тырмы: Арсенлэсь мопедзэ мукет мурт басьтӥз», - вера С. Лавров. Кема но ортчымтэ, Сергейлы ивортӥллям, бускель ульчаысь песятай «Восход» мотоциклзэ вуза шуыса. «Нунал песятай доры ветлыны кутски. «Восходэз» туж «пересь» ке но вал, басьтоно кариськи. Арлыдо пиосмурт тунсыко историоссэ маде вал, нош мон номыр уг кылӥськы, син азям одӥг суред – сюресъёстӥ мотоциклэным ворттылӥсько».
Егит пилэн малпанэз ӝог быдэсмымтэ. Солэн «Восход» басьтыны коньдонэз тырмымтэ. «Кыӵе ке но аспӧртэм «кужым» юрттӥз кадь мыным, ӝытазе футбол шудыса бертыкум, автозаправка вӧзтӥ ортчыкум, сюрес вылысь 500 манет коньдон шедьтӥ. Макем мон шумпотӥ! Кин ке тодыса понэм кадь, мынам 500 манетэ уг тырмы вал мотоцикл басьтыны, - шуэ С. Лавров. – Вазь ӵукна султыса, агаеным «Восход» вузась песятай доры мынӥм. Мотоцикл басьтэмме тодыса, эшъёсы дорам люкаськизы, корт эшме тупатыны кутским. Тупатъян арбериос но утчано луим. Кӧня ке нуналскын «Восход» вырӟиз. Эшеным бусые ширтӥм. Озьы дышетски мотоциклэн ветлыны».
Ар ортчыса, Сергей «Иж» мотоцикл басьтэм.
- Нош ку, кызьы кылдӥз ас киосыныд мотоцикл кылдытон малпанэд? – юасько Сергейлэсь.
- Одӥг нуналэ атай «Комсомольская правда» газет ваем. Отын Уфаысь байкеръёс сярысь статья вань вал. Туспуктэмаз – ӝужыт рулен, лапег пуксёнэн мотоцикл. Мынам но сыӵе маке пӧрмытэме потӥз. «Ижме» вошъяно кариськи: ӝужыт руль пуктӥ, сиденизэ, крылооссэ воштӥ. Со дырысен мотоциклъёсты воштыса тупатон борды басьтӥськи, шуыны луоз. Огъя вить мотоцикл тупатӥ ни, - вера С. Лавров.
Сергей пӧртэм мотофестивальёсы но пыриське. Отысь но маке выльзэ кылдытон малпанъёсын бертэ. «Казаньын ортчем мотофестивальын автомобильлэн двигателеныз мотоцикл тупатон малпанэ кылдӥз. «Окаез» бырйи. Та уже бордын куинь ар тырши. Эшъёсы, тодмоосы, матысьёсы но юрттӥськизы, запчастьёс сётъязы. Умой мотоцикл пӧрмиз, но город урамъёстӥ котыръяськыны секытгес. Нош трассаын – паровоз выллем. Кузь сюресъёсы потыку туж каньыл», - вера С. Лавров.
Кылем арын Сергей выль ужез борды басьтӥськем: трайк лэсьтэ. «Трайк – со куинь питранэн техника, солэн моторез но коробкаез автомобильлэн луоз, азьпалась вилкаез мотоцикллэн кадь», - валэктэ «зарни киё» лэсьтӥськись.
Миляуша БУЛАТОВА.