Гуртысь егитъёс выль корка ӝутӥзы

Янаул ёросысь Барабановка гуртысь Фёдоровъёслэн семьязылы ньыль ар сяна ӧвӧл на. Кузпалъёс пичи дырысенызы ог-огзэс тодыса будӥзы. Рабакысь Ирина пичи дыръяз эшъёсыныз ӵош бускель Барабановкае ӵем вуылэ вал. Пиналъёс футболэн шудыны ярато вылэм. Ӵапак соку ик вуоно картэныз, Альберт нимо пиен, тодматскем. Аръёс ортчыса, пичи дырысь эшъяськонзы яратонлы пӧрмиз. Али егитъёслэн Евгения но Татьяна муспотон нылъёссы будо ни.
- Пичи нылмы вордскем бере милемлы «Устойчивое развитие сельских территорий Республики Башкортостан» кун программае пыриськыны ӵектӥзы. 2018-тӥ арын вань бумагаосмес сётӥм, вуоно араз, оштолэзе, миллионлы матэ коньдонлы сертификат киямы ни вал, - шумпотыса верало кузпалъёс.
Озьы кунлэн юрттэтэныз пайдаяськыса, Иринаен Альберт выль корка ӝутонзэс йылпумъязы. Кылем арын соос корка пырон каризы ни. Кызьы асьсэос шуо, быдэстоно ужъёссы трос на. Али соос пудозылы гид тупатон бордын тыршо. Егитъёс скал, кунян, курег, ӟазегпи утё, бакча возё: сӥльлы но бакча сиёнъёслы уждунзэс быдтоно ӧвӧл.
Кузпалъёс доразы но, ужын но ӵош: кыкназы ик «Мичуринский» свинокомплексын ужало. Ирина – оператор, Альберт – электрик.
Фёдоровъёслэн семьяязы ӟеч сямлы пӧрмиз ни арлы быдэ гужем Ижкаре ветлыны. Отын соос чебер интыосын тодматско, зоопарке вуыло, пыласько. Ириналэн верамезъя, нылъёсыз уяны туж ярато. Янаулысь «Дулкын» бассейнэ но ӵем ветло вал, али гинэ отчы вуылыны уг быгато.
- Городын улон сярысь малпам ик уг поты. Пичи дырысен гуртын будэмын. Асьме коркамы но азбармы мед луоз шуимы. Омырмы но чылкыт, инкуазь, асьме хозяйствомы. «Кытын вордскид, отын ик улоно», - сыӵе малпанэн уло Фёдоров кузпалъёс.
Олеся ТУКТАШЕВА.
(Басьтэмын «Янаульские зори» газетысь).