+20 °С
Салкым
Антитеррор
Вань иворъёс
Общество
24 куартолэзе 2020, 12:50

Витьёслы гинэ дышетско, крезьгурен но эшъясько

Та туспуктэм вылысь мусо пальышась нылъёс Янаул ёросысь Каймашабаш школаын дышетско. Соос куиньназы но витьчиос.

Екатерина Мингалиева (туспуктэм вылын паллянысен буре), Дарина Петрова но Азалия Шайхутдинова ӟеч дышетскемзы сяна, школа ужрадъёсы мыло-кыдо пырисько, Янаулэ кружокъёсы ветлыны но дыр шедьто. «Кырӟаны, спортэн вырыны яратӥсько. Физкультурая урокъёс кельшо. Кылем арын Янаулысь ФОК-е уянъя кружоке ветлӥ, нош туэ англи кылъя тодон-валанме будэтэме потэ», - вера ньылетӥ классын дышетскись Катя. Солэсь одӥг ареслы пичигес Дариналы гитараен шудыны кельше. Та крезьгуро инструментэн атаез но шудэ, пе. Солэсь адӟем карыса, нылашлэн гитараен шудыны мылкыдыз ӝутскем, луоз. «Математикаез яратӥсько на. Доска доры потыса ужъёс быдэстыны кельше», - шуэ нылаш. Дарина «Ошмес» газетэн радъям «ТодАли» визьбур клублэн куатетӥ шудоназ но пыриськиз. Отын со кырӟаны быгатонлыксэ возьматӥз. Кыкетӥ классын дышетскись Азалия но пичиысен крезьгур дуннее кыстӥське. Со баянэн шудэ. Ваньмон дыръяз гуртысь но школаысь библиотекаосы вуылэ. Азалиялы выжыкылъёс кельшо. «Алигес «Дюймовочка», «Три медведя» выжыкылъёсты лыдӟи», - берло лыдӟем книгаоссэ тодаз вайыса вера нылаш. Книгаосын нылъёс ваньзы но эшъясько. Бисерен, лентаосын киужъёс быдэсъяло. Со сяна, юрт котыразы юрттӥськыны но, эшъёсынызы шудыны но дыр шедьто.
(Материал газетэ 2019-тӥ арысь 19-тӥ куарусёнэ потэмын).
Читайте нас: