Семья ӟеч ужъёслы бурдъя

Нуны вордӥське, будэ, анай-атаезлэсь яратэмзэс шӧдэ, валаны кутске чеберез, маин ке тунсыкъяськыны мыдкыдыз кылдэ. Валаны дыше, ма со уродлык, тросгес умой ужъёс лэсьтыны тырше. Со сяна, котькуд анай-атайлэн, песяй-песятайлэн, ӵужай-ӵужатайлэн асьсэлы гинэ тупась сямъёссы, тунсыкъяськонъёссы луо. Сыӵе семьяос пӧлысь мон одно ик висъясал Кургак гуртысь Гадыршинъёсты. Маин соос пӧртэмесь шуоды?
Та семьяын тупаса но огкылысь уло песятай Михаил Гадыршинович но песянай Раиса Минтимировна, соослэн пизы Марат Михайлович но кензы Надежда Фёдоровна. Марат но Надежда Гадыршинъёслэн куинь мусо нылъёссы будо: Дарья, Мария но Виктория. Гадыршинъёс мыло-кыдоесь, асьсэ ужзэс ярато но пӧрмыто, ортчись муртэ ӟеч кылъёсын но пальпотонэн пумитало, куноосты быгатыса утялто, доразы котьку но эшъяськон мылкыд кузёяське.
Та семья – гурт поселенилэн данъяськонэз. Гадыршинъёс котьку шумпотыса пырисько пӧртэм ужрадъёсы. Кылсярысь, ёрос но элькун конкурсъёсы. Кылем арын Дарья «Татьяна» ёрос конкурсэ пыриськиз. Туэ «Чеберинаын» ассэ эскериз. Солы юрттӥськизы песянаез, анаез но кык пичи сузэръёсыз. Нош Надежда Фёдоровна 2015-тӥ арын «Работница» конкурсын быгатонлыкъёссэ возьматӥз. Туэ тулыспал толэзе та семья «Таланты рождаются в семье» ёрос конкурсын нырысетӥ интылы кузё луиз.
2013-тӥ арын Гадыршинъёс «Молодая семья» ёрос конкурсын кыкетӥ инты басьтӥзы. Нош туэ шуркынмон толэзе ортчем таӵе ик конкурсын соос нырысетӥ интые потӥзы. Та семьялэсь вормонъёссэ вераса-лыдъяса но уд быдты! Гадыршинъёс - ёросысь одӥгез учкымон но данъяськымон семья. Соос асьсэ ужъёсынызы вордскем шаермылэсь улонзэ яркытгес но чебергес каро, солэсь данзэ будэто. Тау кылъёс вераме потэ соослы. Шумпотӥськом, ми палан сыӵе кенеш сётыны быгатӥсь песянайёс но песятайёс, котьмалы усто анайёс но атайёс уло шуыса. Нош соослэн визьнодамзыя будо тыршись но котьмалы быгатӥсь нылпиос. Азьланяз та семьялы трос яркыт нуналъёс, бадӟымесь вормонъёс сӥзиськом!
Виолетта НАБИЕВА,
Бадӟым Качак гурт поселениысь егитъёсын ужась ӧнерчи.
Калтасы ёрос.

(Материал газетэ 2018-тӥ арысь 13-тӥ толсуре потэмын).