+18 °С
Салкым
Антитеррор
Вань иворъёс
Общество
20 куартолэзе 2020, 13:47

Пиналъёсыз котьку кужмоесь луо

Разифа Мениева Бадӟым Качак школаын покчи классъёсты дышетэ. Таяз дышетскон арын со нырысетӥ классэ лыктэм пиналъёсты аслаз кужмо бурд улаз кутӥз.

Сизьым пиналъёссэ со лыдъяськыны, лыдӟиськыны но гожъяськыны гинэ ӧз дышеты, соослы мукет трос выльзэ но сётыны тыршиз. Кылсярысь, нылпиос учи.ру сайтысь ужъёсты шумпотыса быдэсъязы. «Пиналъёс сайтысь ужъёсты ӵошатскыса сямен лэсьто. Соос ӵемысь вормисьёс пӧлын луо. Нылпиослэсь тыршемзэс грамотаосын данъяло, - вера 35 ар дышетон удысын тыршем Разифа Павловна. – Анай-атайёс но дышетсконмес радъяны юртто. Пиналъёс урокъёсы котьку дась лыкто». Разифа Павловна классысьтыз пиналъёслэн анай-атайёсынызы шуныт кусып тупатыны тырше. Со тодэ: ӵошен ужаса гинэ нылпиослы ӟеч тодон-валан сётыны, соослэсь быгатонлыксэс быдэсак усьтыны луэ. Разифа Павловналэн таӵе амалэн ужамез «емышсэ» сётэ – пиналъёсыз котьку кужмоесь луо. Соос ёрос конкурсъёсы, пӧртэм ӵошатсконъёсы, дистанционной олимпиадаосы мыло-кыдо пырисько. Нырысетӥ классэ лыктэм пиналъёсыз но ар пумозь ваньмызлы капчиен дышизы. Со сяна, бадӟым опыто дышетӥсьлэн кивалтэмез улсын пиналъёслэн творческой ужъёссы «Кизили» нылпи журналлэн, «Ошмес» газетлэн бамъёсаз печатласько.
- Туэ нырысетӥ классэ нырысьсэ ӧжыт пиналъёс лыктӥзы. Азьвыл аръёсы соос тросгес луо вал. Тужгес бадӟым классэ 19 пиналъёслэсь сылӥз. Туэ соос 9-тӥ классэз йылпумъяло, - вера дышетӥсь.
Разифа Мениева урокъёссэ, внеклассной занятиоссэ мур пуштросо, тунсыко но выль амалъёсын ортчытъяны тырше. Ужъёсаз интерактивной доска, интернет но инты шедьто.
Дышетӥсьлэн ӝутыса вормонтэм зӧк портфолиоез. Отын лыдъяса быдтонтэм трос грамотаос, дипломъёс, тау каронъёс, сертификатъёс. Соос ваньмыз дышетӥсьлэсь азинлыко, тыршыса но сюлэмзэ поныса ужамзэ возьмато. Со школаысьтызы методической объединениен но кивалтэ.
Разифа Павловналэн трос дырыз школаын ке но ортче, киужен вырыны но вутске. Кутскем ужзэ йылаз-пумаз вуттыны тыршыса, куд-ог дыръя уйшорозь но пукисько, пе. Дышетӥсь джутовой шпагатэн керттӥське. «Нылпи творчествоя фестивальын пиналъёсын ӵош ужаломы шуыса дасям вал», - быдэстэм ужъёссэ возьматыса, вера дышетӥсь. Жаляса верано, шаерамы югдур воштӥськемен сэрен ужрад ӧз ортчы.
Разифа Мениева Чиндэр гуртын кузпалыныз но 11-тӥ классын дышетскись Фёдор пиеныз улэ. Кузпалъёслэн Ирина но Алёша нылпиоссы, вылӥ тодон-валан басьтыса, Ижевскын уло но ужало ни.
Марина НИКОЛАЕВА.
Калтасы ёрос.
Читайте нас: