-7 °С
Салкым
Антитеррор
Вань иворъёс
Общество
20 куартолэзе 2020, 12:50

Пинал конферансье

«Школаямы со милям воштыны луонтэм ужрадэз нуисьмы», - вера дышетскисез сярысь Каймашабаш школаен кивалтӥсь Регина Кочурбаева. - Котькуд ужрадэ но сое радъянэ мыло-кыдо пыриськись». Та ӟеч кылъёс Ильмир Гусманов сярысь верамын.

Зӥбыт, востэм сямо бигер пияш сизьыметӥ классын дышетске. Ильмирез бигер шуыны ик уд дӥсьты, со удмурт кылъя но литературая урокъёсы ветлэ. Удмурт сямен чебер, вольыт вераське. Та предметъёсъя тетрадьёсаз но Ильмирлэн янгышъёсыз уг адӟисько. Сокем чебер, шонер гожъямын. «Удмурт литературая урокъёсты яратӥсько. Кылыз чебер», - вера пияш. Удмурт кылъя дышетӥсез Ольга Давлетова но дышетскисьсэ ушъя. Ӟеч лыдӟиське, букваосты но куараосты шонер вера, пе. Таӵе быгатонлыкъёсыз луэмен ик, школа ужрадъёсты радъянын солы вуисьёс ӧвӧл. Кылем арын Ильмир ужрадъёсты, праздникъёсты радъясьёслэн-нуисьёслэн «Конферансье» ёрос конкурсазы кужымзэ эскериз. Татын со кылбур лыдӟиз, ӝогверан вераз, пародия возьматӥз. Оглом вераса, аслаз огъёзоосыз пӧлын вормисе потӥз.
Ильмирлэн портфолиояз пӧртэм конкурсъёсын, ужрадъёсын, ӵошатсконъёсын басьтэм дипломъёсыз, грамотаосыз, сертификатъёсыз трос люкаськемын. Озьы ик отысь умой дышетскемез, ассэ ӟеч воземез но класслэн, школалэн улоназ мыло-кыдо пыриськемез сярысь грамотаосты адӟыны луэ.
Школа улонын «бергамез» сяна, Ильмир серемес веросъёс лыдӟыны, крезьгур кылзыны яратэ. Ваньмон дыръяз эшъёсыныз тол куазен куасэн ветлэ, йӧ вылын хоккеен шудэ, нош гужем - футболэн. Эшъёс сярысь ке верано, Ильмирлэн соос трос. «Классмы милям эшъяськись. Ньыль нылъёс но ньыль пиос ог-огенымы тупаса улӥськом. Тужгес матысь эше Максим луэ», - вера Ильмир. Дорысьёссэ но, ӵужанаен ӵужатайзэ, уг вунэты пияш. Соослы юрт котырын юрттӥське, нош куддыръя ӵужатаеныз шашкиен но шудэ.
(Материал газетэ 2016-тӥ арысь 24-тӥ оштолэзе потэмын).
Читайте нас в