+23 °С
Салкым
Антитеррор
Вань иворъёс
Общество
15 куартолэзе 2020, 13:13

Вуриськись, пудо эмъясь, одӥгез кужмо ужась

Пермь шаерысь Куеда ёросысь Вылысь Гондырысь Эльмира Аднашева дас арлэсь кема ни гуртысьтызы фермаын пудо эмъясь луыса ужа. Со – пудо утён удысысь одӥгез кужмо ӧнерчи.

Эльмира Фаритовна вылын возиське пудоослэн тазалыксы. «Пудоослэсь пӧртэм висёнъёссэс эскерыса улӥсько, УЗИ лэсьтылӥсько. Солы Казаньын дышетски. Кунян ваёно скалъёсты но син азьын возисько», - ужез сярысь вера Эльмира Фаритовна. Пудо эмчилэн уж нуналэз ӵукна тямыс часын кутске. Нош УЗИ ке лэсьтоно, уж дураз вазьгес вамыштэ.
Эльмира Аднашева, огъя верано ке, гурт удысын 1991-тӥ арысен тырше. Нырысь со «Горд кужым» хозяйстволэн кирпич поттон но етӥн сэстон заводъёсаз ужаз. «Али етӥн заводлэн бервылыз гинэ кылиз на. Отын туж умой уждун басьтылӥм, - азьвыл ужан аръёссэ тодаз вайыса вера Эльмира Фаритовна. – Али гурт хозяйствоямы но уждун дыраз басьтӥськом. Кивалтӥсьмы пудоослэсь лыдзэс будэтӥз, фермаос но ӝутылӥз». Кышномуртлэн уж дураз сяна, дораз но трос дырыз пудоос котырын ортче.
Эльмира Фаритовналэн вань на сюлэмызлы матысь ужез но. Со – вуриськон. Та удысэзлы со Красноуфимскын дышетскем. Тодон-валан басьтыса, отын ик ужаны кутскем. Собере Куедаын тыршем. Нош вордскем гуртаз со атаезлэн куремезъя ужаны бертэм. Эльмира Фаритовна Красноуфимскын ужакуз ик улонысьтыз парзэ шедьтэм. «Алнаш ёросэ сюанэ мыныса, Юраен тодматски», – вера со. – Кузпалъяськеммы бере Удмуртиын кӧня ке улыса, Кечтакае бертӥмы. Ӵошен дас вить ар гинэ улыса вуимы, кузпалы бырыны шедиз. Дас тямыс ар огнам улӥсько ни». Эльмира Фаритовна огназ ке но улэ, мӧзмыны дырыз ӧвӧл. Трос дыръя дораз анаез вуылэ. Со гуртазы ик улэ угось. Нош шутэтскон нуналъёсы Пермьысь Олеся нылыз бертылэ. Нуналлы быдэ сямен дораз Алексей пиез кожылэ. Али со Бадӟым Гондыр гурт поселенилэн администрациеныз кивалтэ. Анаез доры со ӵемысь быдэс семьяеныз бертылэ. Эльмира Фаритовна внукъёсыныз ӵош куасэн ветлыны яратэ, гужем – кырын шутэтскыны. Вуриськонзэ но уг вунэты. «Али аслым гинэ вуриськисько на. Азьвыл аръёсы быдэс гуртлы вурылӥ. Со сяна, нылпиос пичи дыръя трос вуриськи», - вера Э. Аднашева. Нош али со выль малпанэн улэ, кудзэ милемлы усьтыны ӧз дӥсьты. Котьмалэн аслаз вакытэз, пе.

Читайте нас: