Сюлэмыз спортэ куриськиз

Григорий Юлкубаевич пичи дырысеныз ик сэзь, визьмо, котькытчы вутскись вал. Школаын дышетскыны кутскем бераз ик Григорий аслаз ульчаяз нылпиос куспын ӵошатсконъёс ортчытъяны кутскем. Соку гуртын нылпиос трос вылэм. Школаын дышетскыкуз спортэн вырем, тужгес но куасэн бызьылонэн, капчи атлетикаен тунсыкъяськем. Но… малпа вылэм Москваысь военной вузэ пырыса, кызьы ке ЦСКА-лэн хоккей клубаз интыяськыны. Соку уго вань нылпиос нырысь лымы вылын хоккеен, берлогес, телевидение потэм бере – йӧ вылын хоккеен – шудӥллям. Гришалэн гуртаз но ньыль хоккейной площадка вылэм. Дас классэ йылпумъям пилэсь документъёссэ военной вузэ пырыны дасяллям. Анаезлэсь синкылизэ адӟыса, Григорий Москва но ЦСКА сярысь малпанэзлэсь люкиськиз. Собере вал комбайнёръёслэн курссы, тракторен тулыс кизёнэ пыриськон, армия. Григорий, танковой войскоосы шедьыса, кык арлэсь ортчемзэ но ӧз шӧды кадь, сокем тунсыко вал службаез. Батальонэзлэсь спортын данзэ ӝутӥз.
Гуртаз берытскем солдатэз библиотекаен но гурт клубен кивалтӥсьлы дэмлало. Егит пи чебересь стендъёс, лозунгъёс лэсьтыны дышетскиз. Культура удысын ужанэз солы спортэн эшъяськонзэ азинтыны но уг люкеты. Гужемъёсы ньыль гуртъёсысь егитъёс, «Родник», «Гарейка», «Звезда», «Чайка» командаос кылдытыса, куспазы футболэн шудо. Та вакытэ Григорий Юлкубаевич шӧдӥз, сюлмыз выльзэ куре шуыса. Озьы со Стерлитамакысь физкультурая техникуме дышетскыны пыре, волейболъя ӧнерез быръе. Дышетсконзэ йылпумъяса, Григорий Юлкубаевич вордскем палъёсаз берытскиз, техникуме кыльыны дэмлало ке но вал.
Колхозэн кивалтӥсьсы А.С. Сократов егит ӧнерчилы квартира висъяз. Ӝоген колхоззы спортэз азинтонъя ёросын гинэ ӧвӧл, республикаын но тодмо луиз. Татын гужем но тол спартакиадаос, футболъя чемпионатъёс ортчылӥзы. Кӧня ке арскын колхозлэн командаез куасэн бызьылонъя, ӝӧквыл теннисъя, футболъя ёрос ӵошатсконъёсын нырысетӥ луиз, Сабантуйын бызьылонын но соос котьку азьпалан вал. Республика ӵошатсконъёсты доразы ортчытон понна, Григорий Юлкубаевич спортзал ӝутон борды кутскыны малпа вылэм. Но сое быдэстыны ӧз пӧрмы.
Огвакытэ школазылэн со дырысь директорез Г. Ш. Шакиров Г. Ю. Тимирбаевлы физкультурая дышетӥсьлэсь ужзэ ӵектӥз. Вылӥ тодон-валанэн дышетӥсь пумит ӧз луы. Со дырысен Григорий Юлкубаевич нылпиослы физкультураез гажан мылкыд пыӵатэ. Усто спортсмен но тренер котькуд пиналэз спортэ кыскыны быгатэ, дышетскисьёсыз азе чурыт куронъёс пуктэ. Григорий Юлкубаевичлэн нылпиосыз но атайзылэсь удыссэ бырйизы. Ижкарын улӥсь Лариса нылыз но Нефтекамскысь Андриян пиез - усто спортсменъёс. Соос волейболэн, теннисэн выро, ӝог бызьыло, футболэн шудо.
Дышетӥсьлэн но тренерлэн кылъёсызъя, со шумпотыса учке аслаз будэтэм спортсменъёсызлэсь чебер шудэмзэс, бызьылэмзэс, тэтчамзэс. Туннэ нуналэ Бадӟым Качак школаысь волейбол командаос ёросазы тужгес кужмоен лыдъясько. Пусйыны кулэ: Григорий Юлкубаевичлэн кичӧлтэмезъя ик Башкортостанысь удмурт школаосысь пиналъёс пӧлын гужем олимпи шудонъёс ортчыло.
Ас удысаз азинсконъёс басьтыны Г. Ю. Тимирбаевлы котьку юрттӥз 37 ар талэсь азьло пумитам Флорида кузпалыз. Соос нылпиоссэс но ӵошен будэтӥзы, юрт котырысьтызы ужъёссэс но кенешыса быдэсто. Кузпалъёс гидкуаязы трос пудо вордо, муш утё. Озьы ке но соос гуртсылэн улоназ но мыло-кыдо пыриськыны вутско: Григорий Тимирбаев - депутат но, кырӟась но, концертъёсты нуись но. Нош шутэтскон нуналъёсы, нылпиоссы атай юртазы берто ке, ньыль внукъёсыныз футболэн, волейболэн, теннисэн шудэ. Сыӵе дыръёсы шудо ӵужатай но песятай шумпотыса вера:«Кивоштӥсьёс будо».
Анна БАЙДУЛЛИНА.