Небыт сюлэмез шулдыртэ улонзэс

Эльмира Санировналы вить полэс анай луыны шуд усиз. «Мон ачим но трос нылпиё семьяын будэмын. Ӵошен уго котьку шулдыр, - пичизэ Эллария нылзэ азяз пуктыса вера со. - Бадӟымъёсыз пичиоссэ учко. Озьы соос ог-огзылы юрттыса, эшъёс луыса будо».
Романов кузпалъёс юртъер котырысьтызы ужъёсты ӵошен быдэсъяло. Евгений Самирович дас арлэсь кема ни Янаулысь «УЖКХ» ООО-ын слесарь-сантехникын тырше, соин быдэс нуналэз уждурын ортче. Со оске: ачиз ӧз ке но луы, кузпалызлы ки пумазы вуэм сизьыметӥ но витетӥ классъёсын дышетскись Азалия но Вадим нылпиоссы юрттозы. «Бадӟымъёсыз юрттӥсько ни. Азалия дорысь ужъёсты быдэсъя, Вадим троссэ атаез котырын берга. Ӵошен соос пудо утё, пу вандо», - вера кышномурт.
- Мон шудыны яратӥсько, суредаськисько. Физкультурая, математикая, англи но удмурт кылъёсъя урокъёс кельшо, - мыньпотыса вераськонэ итӥське куинетӥ классын дышетскись Эвелина нылзы.
Эльмира Санировна - зӥбыт, лякыт сямо кышномурт. Дорысьёсызлы сюлэм шунытсэ кузьмамез сяна, со туж ческыт, пе, пӧраське на. Удалтыса пыжем пӧръёсыз ыме ик курисько. «Анаймы милемыз табанен, пирожкиосын, шаньгиосын, нянен куноя. Ческыт чай лэсьтэ, пӧзьтэм рис ӝуксэ но туж яратӥськом», - вера нылпи садэ ветлӥсь Радмир пизы. Анайзы но куке та нылпи садын пӧзьтӥськисьлэн юрттӥсез луыса тыршем.
Романовъёсты сцена вылысь но пумитаны луэ. Кибашлы Евгений Самирович Радмир пиеныз ужрадъёсты чебер кырӟанъёсын узырмыто. «Вадим но пичи дыръяз кырӟа вал, али будӥз, уг кырӟа ни», - вера гуртозы Людмила Мухаматнурова.
Шудо анайлэн нуналъёсыз пӧртэм сюлмаськонъёсын ке но тырмемын, со трослы азьпала учкыны тырше. Эльмира Санировна син азяз пуктэ ни корказэс ӝутыса быдтэмзэс, выль бадӟым юртын нылпиоссылэсь шумпотыса бызьылэмзэс-шудэмзэс.

(Материал газетэ 2018-тӥ арысь 8-тӥ южтолэзе потэмын).