«Дышетэм аръёсы малпанъёсам уло»

Бурай ёросысь Алтау школаын 39 ар ӵоже ужам Фаина Байметоваез но дышетэм пиналъёсыз уг вунэто, тазалыкез, улон-вылонэз сярысь юалляськыса уло. Ф. Байметова но дышетэм нылпиоссэ, ужам аръёссэ ӵем тодаз вае.
- Алтау школаын дышетэм аръёсы малпанъёсам уло, - шуэ со. - Пиналъёсты но тодам ваисько. Макем шулдыр ужамы, дышетскимы. Вакытаз Алтау школамы сяськаяз. Кӧня данъяськымон нылпиос отысь потӥзы!
Фаина Ильтимировна Бирскысь пединститутэз йылпумъям. Со ӟуч кылъя но литературая, удмурт кылъя но литературая урокъёсты нуэм. Дышетӥсь пиналъёсыныз пӧртэм ужрадъёсы, конкурсъёсы, фестивальёсы пыриськем. Солэн дышетэм нылъёсыз но пиосыз котьку усто быгатонлыкъёссэс возьматӥллям, ужрадъёсысь вормонъёсын бертылӥллям. Быръем удыссэ гажась, кутскем ужзэ сюлмысь быдэсъясь дышетӥсез нылпиос но, анай-атайёс но гажаллям. Кивалтэт солэсь ужзэ вылӥ дунъям. Фаина Ильтимировналэн ужез уно Данъян грамотаосын пусъемын. Со – Башкортостанысь дышетонъя отличник. Фаина Ильтимировналы ужаз кузпалыз, биологияя дышетӥсь Семён Байметов но юрттӥськем. «Ужын но, дорын ми котьку ог-огмылы юрттӥськыса, кенешыса улӥм», - вера Ф. Байметова.
- Семён Минтимирович усто баянист вал. Со гуртмы, калык культурамы, сям-йылолъёсмы мед утиськозы шуыса сюлмаськиз, - верало алтауос. – Гуртысьтымы «Инвожо» фольклор ансамблез но со кылдытӥз. Пусъёно, туннэ Алтауысь «Инвожо» коллектив «калык ансамбль» нимез нуллэ. Соин Семён Минтимировичлэн дышетскисез Ирина Шарафутдинова кивалтэ.
Байметов кузпалъёс куинь нылъёссылы улон кузьмаллям. Элина, Алевтина но Ангелина Нефтекамскын уло. Соос семьяосынызы вордскем гуртазы ӵем вуыло. Алтауын соосты анайзы, ӵужайзы Фаина Ильтимировна шумпотыса вите. Жаляса верано, Семён Минтимирович пӧлазы ӧвӧл ни. «Мынам сизьым внукъёсы. Соосты чидатэк витисько. Нылпиосы котькуд ужын юрттӥсько», - вера Ф. Байметова.
Фаина Ильтимировна сад-бакча утялтыны, чипы-курег утьыны яратэ. Гужем солэсь юртъер котырзэ пӧртэм тусо сяськаос шулдырто. Толалтэ со киужен выре: керттӥське, вуриське, ыжгон черсэ. Тазалыксэ кыдатон сярысь но уг вунэты. «Ӝыт ураме бодыосын ветлыны потӥськом. Ошмес ву юиськом, - вера со. - Нуналлы быдэ сямен гуртмылэсь кык иськемлы палэнэ интыяськем «Питрес ошмесэ» вулы мынӥськом».
Миляуша БУЛАТОВА.
Бурай ёрос.
Туспуктэмез Алексей
САМИРЗЯНОВЛЭН.