Котьма бордысь чеберзэ адӟе

Ирина Шарифулловна огшоры куар яке писпу вай бордысь но чеберзэ адӟыны быгатэ, кыз, пужым ӵыжинъёслэсь букетъёс кылдытэ. Кулэ ке, аспӧртэм панноос но лэсьтоз, чебересь салфеткаос но керттоз, нунокъёсызлы небыт шудонъёс но вуроз, кагазъёслэсь сяськаос но кылдытоз.

Школаын дышетскыкум Ирина Шарифулловна вуриськыны, керттӥськыны дышетӥз. Тужгес но курико венен ужаны кельше вал. Вазаос, кофтаос, юбкаос, шапкаос керттылӥм. Урокъёс туж тунсыко ортчылӥзы. Вакытлэсь ортчемзэ но шӧдытэк кылиськом вал.

Ирина Шарифулловналэн верамезъя, самоизоляция режимын со яратоно ужезлы тросгес дыр висъя. «Дистанционно ужаны дышим ни. Пиналъёс ужъёссэс фотое уськытыса лэзё. Ужамы инкуазь арбериосты кутыны тыршиськом. Озьы магазинэ ветлоно ӧвӧл, коньдон но шыръяське», - вера И. Шакирова.

Кибашлы дышетӥсь киужъёссэ «одноклассники», «вконтакте» вотэсбамъёсы интыя. Соосты трос адямиос дунъяло. Кылсярысь, берлось ужъёссэ со Быдӟымнал азьын лэсьтэм. Композициосыз туж чебересь, аспӧртэм пӧрмиллям.

Ирина Шарифулловна сяськаос но будэтыны яратэ. Солэсь укно дуръёссэ, сад-бакчазэ пӧртэм будосъёс шулдырто.