Веросъёсаз – удмурт калыклэн историез

Кызетӥ даурлэн кутсконаз Совето власть удмуртъёслэсь улонзэс пыраклы воштӥз: калык историлэн тулкымъяськись ӧраз донгемын вал. Гуртын улӥсь калыклы пумтэм шуг-секытъёс но курадӟонъёс пыр потоно луиз. 1960-тӥ аръёсы гинэ соослэн улонзы умой пала воштӥськыны кутскиз.
Ортчем даур асьмелэн матысь ӵыжы-выжыосынымы - анай-атайёсынымы но песянай-песятайёсынымы - герӟаськемын. Со вакытысь улонэз соослэн верамъёссыя син азе пуктӥськом. Но, дыр ортчемъя, ваньмыз вунэ, буёлъёс бездо. Пиналъёсмы троссэ уг тодо ни, со сярысь уг но малпасько. Ортчем вакытэ вуылыны чеберлыко литература юрттэ. Историлы сӥзем литературной произведениос ортчем аръёсты улӟыто, шуыны луоз.
Совето вакытэ удмурт литератураын калыкмылэсь Граждан ож дыръя, колхозъёс кылдыку, Быдӟым Атыкай ож аръёсы улэмзэ возьматӥзы. Соку гожтэм произведениосын улон чебермаса адӟытэмын. Гожъясьёс совето идеологилы пумит мыныны ӧз быгатэ. Тросэз коммунистической партилэн дышетонэзлы оскизы, дыр. Перестройка вакытэ (1985-1991-тӥ аръёсы) гинэ литератураын югдур воштӥськиз. Соку гожъясьёс, партийность принциплэсь куштӥськыса, зэмос улонэз возьматыны быгатӥзы.
Башкортостанысь гожъясьлэн Андрей Гильмаевлэн веросъёсыз камсьӧр удмуртъёслэн улонзылы сӥземын. Гожъясьлэн веросъёсысьтыз геройёс – гуртын улӥсь огшоры адямиос. Соосын герӟаськем учыръёс пыр син азе яркыт пуксё граждан ожмаськон, колхозъёс кылдон, Быдӟым Атыкай ож вакытэ но со бӧрсьы гуртысь улон.
Андрей Гильмаевлы дышетскемезъя историк луэмез, калыклэсь историзэ но сям-йылолъёссэ яратэмез шаерчи луыны юрттӥзы. Солэн улосчиосызлэн азьвыл улэмзы сярысь тросгес тодэмез потӥз. Андрей Васильевич пересьёсын трос вераськылӥз, архив кагазъёсты эскериз. Солэн Татышлы удмуртъёслэн вераськетсылы, историзылы но этнографизылы сӥзем научной но краеведческой ужъёсыз вань. А. Гильмаев научной конференциосы но вуылӥз, аслаз малпанъёсыныз люкиськылӥз. Солэн тросэз ужъёсыз «Азьлань» но «Ошмес» газетъёсын печатласькизы.
1994-тӥ арын Ижевскысь «Удмуртия» издательствоын Андрей Васильевичлэн «Вакытъёслэн гердзы» веросъёсын бичетэз потӥз. Книгалэн нимыз ик возьматэ, со историен герӟаськемын шуыса.
«Вакытъёслэн гердзы» книгалы аннотациын гожтэмын: «автор маде шаерезлэн историысьтыз тужгес но секыт вакытъёсыз сярысь: граждан война, собере пыд йылэ султон аръёс, гуртын сютэм улон, Быдӟым Отечественной война но мукет».
Книгае пыртэм сизьым веросъёс гожъясьлэн вордскем шаерезлэсь XX даурын ортчем сюрессэ возьмато. Нырысетӥез верос («Турнан дыр вал соку») даурлэн кутсконаз луэм граждан ожен ке герӟаськемын, берпуметӥез верос («Чебер кыз») Афганистанын ожмаськонэ пыриськон сярысь. Отын пумиськылӥсь диалект кылъёс, топонимъёс, этнографической тодметъёс но возьмато, авторлэн веросъёсыз вордскем шаерезлы сӥземын шуыса. Лыдӟыны кутскыку ик син шоры йӧто Татышлы ёросысь удмурт топонимъёс: Бермуш но Варади шуръёс, Вукогурт, Вылынгурт, Выльгурт, Бальӟигурт но мукет. Трос веросъёсызлэн сюжетъёсыз Вукогуртэн герӟаськемын. Озьы нимало удмуртъёс Татышлы ёросысь Уразгильды гуртэз. Авторлэн веросъёсаз возьматэм Кузьнюк, Варади выж, Коньыкыр возь, Шордин но Изгуо ошмесъёс, Питырес кыр, Каргурезь но мукет микротопонимъёс гуртын улӥсьёслы али но тодмо.
«Секыт гужем» веросын «Дэмен» колхозлэн азинскем сюресэз возьматэмын. Одӥгаз веросын «Азьлань» газет сярысь но пусъемын. Авторлэн шаерчи луэмез, истори эскеронъёслэсь методиказэс тодэмез, веросъёсысь учыръёс зэмос улонысь басьтэмын, дыр, шуыса малпанэз юнмато. Соос сярысь автор пересьёсын вераськыса тодӥз, дыр. Нош война бере улонэз со ас синмыныз адӟем, ас вылаз шӧдэм.
Книгаысь веросъёс пӧртэм аръёсы кылдӥллям. «Турнан дыр вал соку» но «Секыт гужем» 1986–1989-тӥ аръёсы гожтэмын, мукетъёсыз – 1972–1984-тӥ аръёсы («Чебер кызэз» лыдэ басьтытэк). Совето идеология кузёяськон вакытэ солэн куронъёсызлы тупасьтэм малпанъёсты печатланы ӧй луысал. Соин ик со дыре гожтэм произведениосын калыклэн адӟонъёсыз партилэн линиезлы пумит луись «тушмонъёслэн» ужъёсынызы гинэ валэктӥсько. Соос ке ӧй пумитъяськысалзы, совето улон туж каньыл луысал. Нош перестройка вакытэ гожтэм веросъёсаз авторлэн советской история шоры выль сямен учкемез шӧдӥське ни.
Кылсярысь, «Куинь гинэ нунал» веросын колхозлы пумит луись кулакъёс но соосын герӟаськем «всякой разнойёс» сьӧд буёлъёсын суредамын. Вероссэ гожтыкуз автор ӧз малпаськы, дыр, ма пумысен соос совето властьлы пумит луизы шуыса.
Соцреализмлэн куронъёсызъя гожтэм произведениын колхозчиослэн Вукогуртысь Миклай байлэсь ваньбурзэ асэстэмзы («Кылем толалтэ колхоз кылдэм бере, солэсь куд-ог ваньбурзэ басьтӥзы…») умой ужрадэн адӟытэмын. Нош али валаськом, со ужась адямилэсь улоссэ таркан, ваньбурзэ талан луэ шуыса.
Веросын возьматэм геройёс (кылсярысь, комсомоллэн ёзчиез Митрей) чылкыт сюлмо адямиос луиллямтэ шуыса тодӥськом ни. Соос куанеръёс пӧлысь луиллям, кивалтэт но партия косэм улсын гуртысь узыръёслы улыны маза сётӥллямтэ. Веросын кулакъёслэн но советской азьветлӥсьёслэн образъёссы соцреализм манерен ке но пӧрмытэмын, огшоры калыклэн малпанъёсыз зэмлыклы матын карыса сётэмын. Демьянлэн «Толон тӥ соосты кышкатӥды, нош туннэ соос асьтэлэсь кукъёстэс тӥяны быгатозы. Марлы шумпотонэз?» шуыса вазиськемысьтыз шӧдӥськом, калык кыӵе синмын учке соослэн нюръяськемзы шоры.
«Турнан дыр вал соку» веросын автор ортчем событиос шоры учконзэ воштэ. Гордъёс азьло сямен ик умоен гинэ ке но возьматэмын, тӧдьыос «кык пыдо изьверъёс» ке но шуэмын, соослэн адямилыко луэмзы но пусъемын. Веросысь Камайлэн кылъёсаз («Тӧдьы-а, горд-а – асьме понна ваньмыз одӥг, огзы но кулэ ӧвӧл. Музъеммес, валъёсмес гинэ медаз басьтэ, асьмемыз сютэм медаз кельтэ») авторлэн аслаз малпанъёсыз шӧдӥсько кадь. Озьы ке но Камайлэн нылызлэн, Надялэн, гордъёслы дурбасьтэмез умоен возьматэмын…
«Секыт гужем» веросын авторлэн позициез чутрак воштӥськемын ни. 1947-тӥ арын сютэм улон инкуазь кӧс луэмен но ю тысь удалтымтэен гинэ герӟаськемын ӧвӧл, колхозлэн но ёрос кивалтэтлэн кӧттырмостэм луэменызы но. Граждан ож, колхозэ кужмысь пыртон, фашистъёсын ожмаськон пыр потэм калыкез колхозэн кивалтӥсьёс, бригадиръёс, бригадной охранникъёс, налоговой агентъёс, уполминзагъёс, заёмъя уполномоченнойёс киултыса возё. Колхозын ужасьёслы трудоденьёссы понна пызь но ю тысь сёто, нош налогъёс но заёмъёс понна уксё куро. «Налоглы тыроно, заёмлы тыроно, вакытаз тырыны быгатӥллямтэ ке, эшшо недоимкаез люкаське», - гожтэ автор. Писатель совето властез ӧз курла, солэсь шекъёссэ гинэ адӟытыны выриз.
Андрей Гильмаевлэн веросъёсыз удмурт калыклэсь ортчем улон сюрессэ син азе пукто. Ас вакытазы кутӥськем кылъёс но (архаизмъёс но советизмъёс) адӟытэм дырлэсь шӧмзэс яркыт возьмато. Кылсярысь, пичи Толя вера: «Кӧт сюма, анай…Пичи гинэ, чумер быдӟа ке но мед сётозы. Нянь сием потэ». Та чуръёсты лыдӟыса, шимес сютэмлыкез ас вылад шӧдӥськод кадь.
«Пумиськон – келян» пичи этюд А. Гильмаевлэсь литератураысь покчи жанръёсъя усточи луэмзэ возьматэ: Байдиналэсь но Петырлэсь весяклы люкиськемзэс валэктӥсь кылъёстэк но валаськом. Та яркыт суред ик возьматэ ожмаськонлэсь быдӟым трагедизэ.
А. В. Гильмаевлэн «Вакытъёслэн гердзы» книгаяз пыртэм веросъёс удмурт кылъя но литературая дышетӥсьёслэн ужазы бадӟым юрттэт луо, дыр. Веросъёс нылпиосты удмурт калыклэн XX дауре ортчем секыт сюресэныз тодмато, ӵыжы-выжыоссэс гажан сям пыӵато.
Ранус САДИКОВ,
истори наукаосъя доктор.
Уфа город.