Выль коркан "ми" кузёяське

Гульнара Сайфулловна Екатеринбургын вордӥськиз ке но, быдэ вуиз Калтасы ёросысь Наратово гуртын. Нош вуоно кузпалыныз солы Шудекысь культура юртын тодматскыны кылдӥз. Гульнара Бирскысь медучилищеын тодон-валан басьтыкуз, Конигово гуртысь ӵош дышетскем эшез доры куное вуылэм. Егитъёс 2000-тӥ арысен ӵошен улыны кутскизы. Шумпотоно, туннэ нуналэ Хайретдиновъёслэн ньыль муспотонэсь нылпиоссы будо ни. Юлия нылзы анаезлэн пытьыетӥз вамыштӥз. Со школаез йылпумъяса, Бирскысь медколледжын тодон-валан люка. «Юлиялэсь ӟеч эмчи пӧрмоз, - вера Гульнара Сайфулловна. – Со адямиез валаны быгатэ».
Алина но Ильнур Шудек школаын укмысэтӥ но сизьыметӥ классъёсын дышетско. Соос ньыльёслы но витьёслы гинэ дышетскемзы сяна, пӧртэм ужрадъёсын, конкурсъёсын асьсэды синмаськымон возьмато. Алинаен Ильнур кырӟаны, эктыны, суредаськыны усто. Школаын, гуртысь культура юртын ортчись ужрадъёсты ӟеч нуэменызы висъясько. Янаулысь нылпи садэ ветлӥсь ньыль аресъем Арина но апай-агаезлэсь адӟем каре. Шаплы нылаш учкисьёсты кылбуръёс чебер вераса паймытъя. Солы анаез кылбур бырйыны юрттэ.
Гульнара Сайфулловна ачиз но туж етӥз кышномурт. Янаулысь стоматологической поликлиникаын медсестраын ке но ужа, юрт котырзэ ӝикыт возён, нылпиоссэ пичиысен ужез гажан мылкыд пыӵатон сярысь сюлмаське. «Киужен вырыны кельше. Керттӥськыса ӵукнаозь но пукыны быгатӥсько. Аринамы керттэм дӥськутгес нуллыны яратэ. Со сяна, сяськаосты будэтыны но утьыны туж яратӥсько», - мылкыдзэ усьтэ Гульнара Сайфулловна. Янаулын «ТаргинМеханоСервис» ООО-ын электрогазосварщикын тыршись Рустэм кузпалыныз соос огкылысь, тупаса уло. Пусйытэк кельтыны уг луы Рустэм Геннадьевичлэсь оскымон, ӟеч сварщик луэмзэ но. Со уждураз тыршем сяна, гужем нуналъёсы гуртоосызлы, Янаулысь тодмоосызлы котьку юрттэ.
Егит семья витетӥ арзэ ни асьсэ кужыменызы ӝутэм выль коркан улэ. Татын котьку но «ми» кузёяське. «Ваньзэ ми ӵош лэсьтӥськом, - вера Гульнара Сайфулловна. - Кухняын ӵошен пӧраськом, сад-бакчаын дэмен ужаськом, праздникъёсты но огинэ люкаськыса шулдыр ортчытъяськом».
Марина НИКОЛАЕВА.
Янаул ёрос.
(Туспуктэм «Янаульские зори» газетысь басьтэмын).

(Материал газетэ 2017-тӥ арысь 25-тӥ куартолэзе потэмын).