-16 °С
Салкым
Антитеррор
Вань иворъёс
Общество
17 апрель 2020, 12:00

Ог-огзэс валаса но тупаса

Тросэз туала егитъёс городэ кыстӥсько. Но вань егитъёс, кудъёсыз вордӥськем гуртазы ик выжы лэзё. Балтач ёросысь Асавкаысь Светлана но Ростислав Миндияровъёс но палэнэ кошкыны ӧз дыртэ, гуртазы ик улыны интыяськизы.

Егитъёс одӥг гуртын будӥзы, одӥг школаын ик ӵош тодон-валан люказы. Шудо школа аръёсы ик соос ог-огзэс синйылтӥзы, луоз. Куать ар эшъяськемзы бере, семья кылдытӥзы. Али егит кузпалъёслэн шумпотонзы - Инесса нылзы - будэ.
Светлана Чайковскийысь индустриальной колледжез йылпумъяса, гуртысьтызы нылпи садэ ужаны интыяськиз. «Нылпиосын ужаны кельше. Нылпи садмы гинэ медаз ворсаськы», - шуэ егит ӧнерчи. Нылпи дуннеын улэмез сяна, Светаез пӧртэм ужрадъёсысь пумиталод на. Со гуртысьтызы «Чибориё» ансамбльын кырӟа-эктэ, куасэн бызьылонъя ӵошатсконъёсын кужымзэ эскере, ёрос конкурсъёсы пыриське.
Ростиславлы семьяезлэсь кӧнялы ке люкиськоно луэ. Со Свердловск улосвылын вахта амалэн ужаса ветлэ. Нош шутэтскон нуналъёсыз семьяеныз ӵош ортчо. Егит кузпалъёс Ростиславлэн ӵужанаеныз но ӵужатаеныз ӵош уло. Мария апай но Юра агай нылпиоссылы улонын юн пыкъет луо. Со сяна, арлыдо кузпалъёс егитъёслы визь-кенешен но юртто. Ӵошен соос ог-огзэс валаса но тупаса уло.

(Материал газетэ 2017-тӥ арысь 3-тӥ гудырикошконэ потэмын).
Читайте нас в