Шунытсэ ньыль пиослы кузьма

Инга вуоно кузпалыныз ӝыт шудон пӧлын тодматскем. Егит сюлэмъёс куспын яратон кенжем. Кык ар эшъяськемзы бере, Ингаез выль кенлы лушкаллям. Туэ гужем соослэн семья кылдытэмзылы дас вить ар тырмоз. Ингалы пиналысен юрт утисьлэсь кужымзэ веръяно луиз. Солэсь усто кузпал но анай пӧрмиз. Котькуд ӵукна со батыръёссэ шумпотыса келя: пиоссэ - дышетскон юртъёсы, кузпалзэ - уж дураз. Собере гурт ужъёсыз борды басьтӥське. Юрт кузёосты гидкуаын трос пудоос возьмало. Уго туала вакытэ соостэк улыны шуг. «Скалъёс, кунянъёс, парсьёс утиськом. Гужем азбармы ӟазег-ӵӧжъёсын узырме», - вера Инга. Ог-огдэ валаса гинэ улон сюрестӥ ӵошен вамыштыны луоно. Алексей кузпалыныз соос ог-огзылы тупаллям.
Алексей пичиысен техникаос бордын берганы яратэм. Укмыс классэ йылпумъямез бере, кема малпаськыса улымтэ, трактористлы дышетскем. Со дырысен Алексей корт эшеныз уг люкылӥськы. Вазь тулысысен бер сӥзьылозь со гурт хозяйствоын мылысь-кыдысь ужа. Шумпотыса тырше та вакытэ бусы ужъёсын. Толалтэ гинэ егит ужасьлэн ЗИЛ машинаез укно улаз ужлэсь мӧзмыса шыпыт сылэ. Нош семьяез сярысь сюлмаськись кузёлэн кезьыт тол нуналъёсы но мӧзмыны дырыз ӧвӧл. Ми вуылон нуналэ но егит кузпал, атай палэнэ ужаны кошкемын вал. Дораз сое кузпалыз но пиосыз чидатэк витё.
Андреев кузпалъёслэн куинь кивоштӥсьёссы но шумпоттӥсьёссы будо. Вить аресъем Юстин но куинь аресъем Вячеслав нылпи садэ ветло. Нош бадӟымез, Кирилл пизы, витетӥ классын дышетске.
- Кирилл - бадӟым юрт-тӥсе. Со юрт котырысь ужъёсты валаса быдэсъя. Асьмеос ӧвӧл дыръя пудоосты но сюдэ, - данъяськыса вера бадӟым пиез сярысь анай. – Туэ гужем тракторен ветлыны дышетскиз, атаезлы техникаоссэ тупатъяны но юрттэ.
Кириллэн гужем эшшо одӥг бадӟым ужез ватсаське на. Соос атаенызы муш утё. Та удысын тыршыса поттэм ваньбурзы асьсэлы но, вузаны но тырме. Кылсярысь, кылем арын соос кӧнязэ ке укнооссэс воштыны быгатӥллям.
Ужез гажась семья музъем ужлэсь но уг кышка. Куинь гектарлэсь трос музъемзэс арлы быдэ уже куто. «Кылем арын турын кизим. Нош солэсь азьвыл чабей будэтӥм, - вера семьялэсь шунытсэ утись Инга Фаритовна. – Ужаны но вутскиськом, шутэтскыны но дыр шедьтӥськом. Гужем нуналъёсы чылкыт омырен шокаськом, ву дуре ветлӥськом. Интернетын пукыны но дыр шедьтӥськом».

(Материал газетэ 2017-тӥ арысь 2-тӥ южтолэзе потэмын).