+18 °С
Салкым
Антитеррор
Вань иворъёс
Общество
16 апрель 2020, 13:25

Бадӟым ужмес "Ошмес" газетлы гожтӥськон бордысен кутскоме

Башкортостанысь удмуртъёслэн национально-культурной центрзы кылдэмез дырысен ни республикаысьтымы пиналъёс, ужась калык, арлыдоос пӧлын пӧртэм ужрадъёс ортчытъя. Огазеяськонлэн валтӥсь ужпумез – асьме калыкмылэсь культуразэ, сям-йылолъёссэ но кылзэ утён. Но, жаляса верано, Россия Федерацилэн Президентэзлэн Владимир Путинлэн кутэм указэзъя, туэ троссэ ужрадъёсмес берлолы выжтоно яке ортчытытэк кельтоно луиськом.

Нырысь ик вераммы потэ нылпи творчествоя фестиваль сярысь. Туэ со Калтасы ёросысь Бадӟым Качак школаын ортчыны кулэ вал. Та выллем ужрадъёс пиналъёслы трос выльзэ сёто. Соос пӧлысь одӥгез анай кылэз гажаны дышетон луэ. Берло аръёсы сюлэм вӧсь луэ пиналъёслэсь куспазы ӟуч сямен вераськемзэс кылыса. Нылпи творчествоя фесьтивальын но пиналъёс пӧлысь тросэз ог-огенызы ӟуч сямен верасько. Малы таӵе югдур кылдэ? Зэм, тросэз шуозы: пиналъёс телевизор трос учко. Отын ваньмыз ӟуч кылын. Ӟуч кылэз тодыса, пиналъёслы дышетскыны капчи. Анай-атайёслэн таӵе кылъёссы огласянь шонер. Но анай кылэз тодэм кинлы ке люкетӥз ни меда? Туннэ тросэз егитъёс семья куспазы, пиналъёсынызы ӟуч сямен верасько. Со бордысен ик уг поты меда асьмелэн ӟучомонмы? Табере куд-ог школаосын удмурт кылэз но, кунгож кылъёсты сямен, словарьёсын яке ӟуч кылын дышетоно луо ни. Валантэм югдур. Нош кылмы ке ышиз, удмурт калык но ышоз. Лулчеберет, сям-йылолъёсмы гинэ уз юрттэ ни сое утьыны.
1999-тӥ арын, кылмы, калыкмы медаз ышы шуыса, республикаямы удмурт кылын «Ошмес» газет поттыны кутскизы. Сое калык пӧлы вӧлмытон понна трос кужым быдтэмын, трос сюресъёс лёгамын. Но берло аръёсы сое лыдӟись кулэсме. Ватонэз ӧвӧл, дыр, туала вакытэ трос иворъёсты вотэс бамъёсысь шедьтыны луэ шуыса. Нош республикаямы улӥсь удмурт калык сярысь, асьмелэн пиналъёсмылэн вормонъёссы сярысь отчы трос гожъяло меда? Туннэ сыӵе иворъёсты «Ошмес» газетысь но солэн вотэс бамъёсысьтыз шедьтыны луэ. Гажано анай-атайёс, песяйёс-песятайёс, ойдолэ ум сётэ анай кылмылы бырыны. Бадӟым ужмес «Ошмес» газетлы гожтӥськон бордысен кутскоме. Сое лыдӟемзы бере пиналъёсмы шумпотыса тӥледлы анай но атай, песяй, песятай, ӵужай но ӵужатай шуыса мед вазиськозы.
Салимьян ГАРИФУЛЛИН, БР-ысь удмуртъёслэн НКЦ-енызы кивалтӥсь.
Юрис САИТОВ, Юрий САДЫРОВ, Ирина САМИГУЛОВА, БР-ысь удмуртъёслэн НКЦ-зылэн Кенешезлэн ёзчиосыз.
Читайте нас: