Ужбергатонын – 18 ар

Нырысь Выль Татышлые вузкарон ларёк пуктӥллям. Кӧня ке дыр ортчыса, «Витязь» магазин ӝутӥллям. Туннэ нуналэ татысь пӧртэм сиён-юонъёс, нуналлы быдэ кулэ луись вузъёсты басьтыны луэ. «Витязьын» ужасьёс Марита Даваева но Альмира Нуриева котькуд пырисез пальпотыса, ӟеч мылкыдын пумитало. Соослы трос дыръя Милана Сабировна юрттӥське. Со ик бухгалтериен герӟаськем ужъёсты нуэ.

Вузкарисьёслэн кылъёссыя, «Витязе» арлыдоос, школаын дышетскисьёс, пе, ӵем вуыло. «Гуртмы ёрос центрлэсь кыдёкын ӧвӧл. Тросэз отын ужало. Вылысь Татышлыысь вузкарон юртъёсын ик басьясько. Кинлэн Вылысь Татышлые ветлыны луонлыкез ӧвӧл, соос милям магазинамы лыкто. Со сяна, Выль Татышлыын мукет вузкарон юрт вань на», - вера Милана Сабировна.

"Гуртын ужбергатӥсьёслэн луэмзы но бадӟым юрттэт, - вера Выль Татышлы гурт поселенилэн администрациеныз кивалтӥсь Н. В. Рахимьянов. - Яков Минказиповичен, кылсярысь, ӵош ужаськом. Ужрадъёс ортчытыку со спонсор юрттэт возьматэ. Техникаен но ӵем юрттэ. Камидуллинъёс гурт калыклэсь куронъёссэ лыдэ басьтыса ужало».