"Гуртын улыны кельше"

Норканын быдэ вуэм Павлина Янаул городысь УПК-ын повар-кулинарлы, Нефтекамскысь 27-тӥ лицейын пекарь-кондитерлы дышетскемын ке но, гуртын та ӧръя уж шедьтыны шуг. Нош Янаулэ ветлыса ужаны луонлык, пе, ӧвӧл. Соин егит кузпаллэн уж сюресэз гуртысьтызы скал вордон фермаысен кутскем. Татын со скал кыскисьын одӥг арлэсь кема ужаса вуттымтэ, скалъёсты Шудеке, пе, нуизы. Пудоос сьӧрысь Павлина но кыльымтэ - Шудеке ужаны выжем. Со дырысен Павлина кунян утисьын вить ар тырше ини. «Секыт дыръёс но, капчи дыръёс но луо. Толалтэ секытгес. Соку кыед поттон трос люкаське, нош гужем кунянъёс кырын уло», - вера со. Егит кышномуртлэн сюлмаськемез, тыршемез улсын 50-лы матэ кунянъёс будо. «Уж кельше. Ужаны кутскыку кышкыт вал. Али дыши ни. Ӧд ке вала, валэкто. Уждурамы автобусэн нуо-ваё. Вакытаз уждун тыро», - вера Павлина. Солэн Александр кузпалыз но гуртысьтызы фермаязы тыршем. Сое ворсамзы бере Шудек фермае выжем. Татын тыршыкуз ик тракторен ужаны вазиллям. Со дырысен Александр «Победа» ООО-ын МТЗ-1221 трактореныз гурт хозяйствоысь ужъёсты быдэсъя.
Егит кузпалъёс Александрлэн анай-атаенызы ӵош уло. Соос ик егит кузпалъёслы кык аресъем Ксения нылзэс утьыны юртто. Павлина но Александр асьсэлы нимысьтыз улон инты сярысь но сюлмаськиллям. Соос гуртазы ик выль корка ӝуто. Асьсэ кужымен быдэстэм юртсы липет улэ пыртэмын ни. Тыл кыскемын, газ пыртымтэ на, пе.
Палэнэ улыны интыяськыны мылкыдды ӧй вал-а шуыса юамелы, Павлина вакчияк гинэ шуиз: «Пичиысен гуртын улэм бере, татын ик улыны кельше».

(Материал газетэ 2018-тӥ арысь 1-тӥ шуркынмонэ потэмын).