Гуртъёслэн вуонозы - тыршыса ужан бордын

Школаос, библиотека, магазинъёс…
Выль Татышлы гурт поселениын 389 хозяйство лыдъяське. Отын 1490 адями улэ. Гурт поселениын кык школа, кык фельдшерско-акушерской пунктъёс, одӥг культура юрт, модельной библиотека, республикаысь удмуртъёслэн историяя но культурая центрзы, почта ёзэт, куать магазинъёс, «Дэмен» СПК-лэн правлениез, инкубатор ужало.
Выль Татышлы шор ёзо школаын Калмиярысь, Петропавловкаысь, Бальзюгаысь, Майскысь, Выль Татышлыысь, Уразгильдыысь, Савкиязысь но Асавдыысь пиналъёс дышетско. Уразгильдыын – основной школа. «Гурт поселениямы «Дэмен» СПК азинлыко ужа. Ужасьёс дыраз уждун басьто. Зэм, огдыре хозяйство секытлыкъёсын пумиськоно луиз. Но туннэ нуналэ югдур умой пала воштӥськемын. 2017-тӥ арысен «Дэменэн» Зайнетдин Тимерханович Бадртдинов кивалтэ. Со шуг-секытъёсты вормыны быгатӥз, - вера Николай Владимирович. – Кужмо хозяйство луыку, гурт поселенилы капчигес, бадӟымесь ужпумъёсты ӵошен сэрттӥськом-пертчиськом. Гуртын ужбергатӥсьёслэн луэмзы но бадӟым юрттэт. Яков Минказиповичен, кылсярысь, ӵош ужаськом. Ужрадъёс ортчытыку со спонсор юрттэт возьматэ. Техникаен но ӵем юрттэ. Камидуллинъёс гурт калыклэсь куронъёссэ лыдэ басьтыса ужало».

(Материалэз быдэсак лыдӟыны луоз газетлэн 16-тӥ номерысьтыз).