Ӝутӥськонысь лулчеберет удысэ вамыштӥз

- Милям со артисткамы, валтӥсь кырӟасьмы. Удмурт кырӟанъёсты сяна, Света апаймы бигеръёссэ но чебер быдэсъя. Котьмалы усто со, ужаны но шаплы. Гулъёсты котьку умой утялтыса возе, - вера культура юртэн кивалтӥсь Алевтина Набиева.
Кургак гуртын вордӥськыса будэм Света апайлэн куараез зэмзэ но жингрес но чебер. Солэсь кырӟамзэ кылзыса, уд но малпа, та ненег кышномурт ӝутӥськисьлы дышетскемын шуыса. «Куинь ар Уфаын ӝутӥськисьлы тодон-валан люкай. Собере татын ик дышетскемея дас вить ар ужай. Бӧрысь Бадӟым Качаке бызи», – вера Света апай.
- Азьвыл уждылэсь уд мӧзмиське-а? – тунсыкъяськисько Света апайлэсь.
- Вӧтэ пыре, - серекъяса вера со.
Ӝутӥськисьлы басьтэм тодон-валанэз Света апайлы али уж дураз но бадӟым юрттэт сётэ. Кибашлы кышномурт висъетъёсты тупатъя, буя.
- Тупатъяськон ужъёс бырыса ик уг уло, кыӵе ке но ужъёс шедё, - вера Алевтина Алексеевна. – Ужъёсты ми ваньзэ ӵошен быдэстыны тыршиськом. Ми Света апайлы юрттӥськом, со – милемлы.
Светлана Шараевна дораз но кырӟанэн уг люкиськы. Юрт котыраз кырӟаса, пе, ветлӥсько. «Мынам анаелэн но куараез чебер, ӵужаелэн эшшо но чебер вал, - вера со. – Тямыс нылпиос пӧлысь ми Клава дыдыеным гинэ кырӟаськом». Али Света апай гурт удысын механизаторын тыршись Владислав кузпалыныз но солэн 86 аресъем Катифа анаеныз ӵош Бадӟым Качакын уло. Нылпиоссылэн асьсэ улонзы. Рустам пизы Нефтекамскын улэ, Оксаназы – Калтасыын.
Марина НИКОЛАЕВА.
Калтасы ёрос.

(Материал газетын 2018-тӥ арысь 15-тӥ номере потэмын).