Выль юртэ выжон - со бадӟым шумпотон

Со сярысь Алиса но Илья Арслановъёс сюлмаськизы.
- Гуртысьтымы ик мукетсэ корка басьтыны малпаськомы вал, - вера Алиса. – Милесьтым улон интылы кулэяськеммес тодыса, ёрос администрациысь физической культурая, спортъя но туризмъя комитетлэн кивалтӥсез Вячеслав Имасевич Кугубаев «Социальное развитие села» программае пыриськыны ӵектӥз но выль корка ӝутон сярысь малпаськыны куриз. Озьы ми анаймурт капиталэз уже кутыса, выль юртмылы фундамент понӥмы но мугорзэ ӝутӥмы. Кун юрттэт басьтытозь, коркамес липет улэ пыртӥмы. Собере ни кылем ужъёссэ быдэстыса, 2017-тӥ арын отчы выжимы.
Илья Фанилевичен пумиськыны ӧз кылды. Со ньылетӥ арзэ ни «Победа» ООО-ын механизаторын тырше. Ӵукна вить часысен, пе, уждураз кошке но ӝыт куате гинэ семьяез доры вуэ. Дораз сое яратоно кузпалыз но нылпиосыз – Максим, Илина но София - витё. Максим Бадӟым Качак школаын ньылетӥ классын дышетске. Нош ньыль аресъем Илина но кык аресаз вамышъясь София доразы уло.
Выль юртын нылпиослэн котькудзылэн асьсэлэн висъетсы вань, кытын соос ог-огзылы люкетытэк тодон-валан люканы но шудыны быгато. Егит кузпалъёс шуныт но шулдыр выль юртэ потэмзылы пумтэм шумпото но Вячеслав Имасевичлы юрттэмез понна тау кылъёссэс верало.

(Материал 2018-тӥ арысь 3-тӥ куартолэзе потэмын).