Оскем ужез капчиен быдэстэ

Михаил Гадыршинович Кургакын ик вордӥськиз но будӥз. «Мон война бере будэм адями. Семьяямы ваньзы апайёс. Мон огнам пи вал», - ас сярысьтыз вакчияк вераз Миша агай. Школаез ӟеч йылпумъяса, Михаил Гадыршинович тодон-валан люканзэ Уфаысь БСХИ-ын азинтӥз. Егит ӧнерчи луыса со гуртаз ик берытскиз. «Красная Звезда» хозяйствоязы зоотехник луыса ужаны кутскиз. Капчи ӧз луы Михаил Гадыршиновичлы кышкыт ож бере куашкам гурт улонэз выльысь пыд йылаз султытыны. Озьы ке но со быръем удысэзлэсь ӧз чигна. Уждураз котьку капчи мылкыдын вамыштылӥз. «Секыт вал. Тракторъёс ӧвӧл. Вань ужъёсты валъёсын быдэсъяллям. Ӵукна султӥськом но валэз кыткыса фермаосы кошкиськом вал. Соку пудо трос вордылӥм. Сюро таза пудоосты гинэ 2200 пала утялтӥм, 250 йыр валъёс, 3000 ыжъёс, 500-600 парсьёс лыдъяськизы. Бадӟым Качак, Чиндэр, Кургак, Качкин-Турай, Кугарчин, Нарат фермаосы нуналлы быдэ сямен вуылӥськом вал», - вера Миша агай.
Уждурын пӧртэм дыръёс луо. Михаил Гадыршиновичлы но удысэзлэсь кӧня ке арлы люкиськоно луылӥз. Тямыс ар со партийной организацилэн секретарез луыса ужаз. Собере, улонын воштӥськонъёс луэмен, Михаил Гадыршиновичлы выльысь азьвыл удысаз берытсконо луиз. Оглом вераса, куамын вить ар со гурт улонэз азинтон бордын мылысь-кыдысь но кужымзэ жалятэк тыршиз. Со понна Михаил Гадыршинлы «БР-ысь гурт удысысь сӥё-дано ужась» ним сётэмын. Туннэ нуналэ но со вордӥськем гуртэз понна сюлмаське. Таяз арын «Программа поддержки местных инициатив» проектъя гуртсылэсь ульчазэс тупатӥзы. Отын инициативной группа кылдытэмын вал. Соин Михаил Гадыршинович кивалтӥз.

(Та материал газетмылэн 2017-тӥ арысь 12-тӥ коньывуонэ печатламын).