+9 °С
Салкым
Антитеррор
Вань иворъёс
Общество
25 южтолэзь 2020, 14:00

Вуоно удмурт офицер

Алигес вконтакте вотэсбамам тодмотэм егит пи – Андрей Огневиков – эшъёсы пӧлы куриськиз. Ымныр тусбуезъя валай, со – удмурт. Нош фамилиез пумысен ӧжыт тунаськоно луиз. Выль тодмое Татышлы ёросысь Утар-Елга гуртысь Антон Иванов вылэм. Санкт-Петербургысь Михайловской военной артиллерийской академилэн курсантэныз вераськонмы вотэсбам пыр пӧрмиз.

- Пичи удмурт гуртын будэм пи кызьы военной академие мыныны дӥсьтӥз? – паймемме ватытэк гожтӥсько солы.
- Мон 2008-тӥ арысен ик военной луон сярысь малпанэн улӥсько ни вал. Соку абзие военной училищее дышетскыны пыриз. Курсант луыса гуртамы бертэмез бере, мынам соин данъяськон мылкыды пуромиз. Туж синмаськи соку абзиелэн формаезлы. «Мон но куке но таӵе дӥськутэн ветло», - малпай. Озьы военной училищее яке мукет соин герӟаськем дышетскон юртъёсы пырыны дасяськон борды кутски. Тямысэтӥ классысен «Зарница» ӵошатсконъёсы ветлӥ, ОБЖ предметъя ёрос олимпиадаын кужымме эскери. Нош укмысэтӥ классэз йылпумъяме бере, малы ке но малпанъёсы воштӥськизы, улонме мукет удысэн герӟан сярысь малпаськыны кутски. Озьы ке но дышетсконме Улысь Балтачысь шор ёзо школаын азинтоно кариськи. Дас одӥгетӥ классын дышетскыку валай, мынам сюлэмы военной академие куриське шуыса. Толсур толэзьын отчы пырон понна пыр-поч дасяськыны кутски. Тулыс эшеным ӵош бызьылыны потамы, турникын ӝуткаськимы. Бадӟым юрттэт возьматӥз классэн кивалтӥсьмы Радмир Владимирович Губаев. Со монэ командовать карыны, вамышъяны дышетӥз. Со понна солы бадӟым тау шуэме потэ.
- Анай-атаед пумит ӧз луэ-а пизэс военной академие дышетскыны келяны? Семьяязы одӥг военнойзы вань вал ни ук.
- Анай-атай пумит ӧй вал, соос быгатэмзыя юрттыны тыршизы, дышетскыны пырыны быгатонэлы оскизы. Абзие гинэ, кудӥз али офицер, мынам малпанъёсылы пумит луиз. «Малы со тыныд кулэ? Программистлы дышетскы!» - валэктылӥз со. Дышетскыны пырыны мынон дыр вуэм бере но таӵе ик кылъёссэ вераз на. Озьы ке но мылкыдме воштыны ӧз быгаты.
- Тынад малпамедъя, военной адями кыӵе луыны кулэ?
- Нырысь ик со тазалыко улонэн, спортэн мед эшъяськоз, быдэстэм ужез понна кыл кутыны мед быгатоз.
- Табере дышетсконэд сярысь вакчияк тодэм потэ.
- Мон нырысетӥ арзэ дышетскисько. Кылем арысь 2-тӥ пӧсьтолэзьысен 19-тӥ пӧсьтолёзь абитур вал. Со Луга городын ортчиз. Дас укмысэтӥ пӧсьтолэзе мандатной комиссия луиз. Конкурсэ 300 адями пыриськиз. Сое азинлыко ортчем бере зэмос военной улон кутскиз – одӥг толэзь ӵоже курс молодого бойца ортчим. Собере Санкт Петербурге лыктӥмы, присяга кутӥмы. Присягае анае но ветлӥз.
Дышетскон нырысь секытэнгес сётскиз. Ӵукна куатьын султылӥм, соин параосын но изем потэ вал. Нош али ваньмызлы дышимы ни. Татын вить ар дышетско. Мынам военной специальносте «Применение подразделений артиллерии», нош гражданскоез – «Инженер-электромеханик». Дышетсконэз лейтенант званиен йылпумъяло.
- Шаермес утисьёслэн нуналзы азьын Михайловской военной артиллерийской академилэн курсантъёсыз пушкаосысь 30 залп лэсьтӥзы. Соку одӥгаз снарядын «Татышлинский район» гожтэмын вал. Мӧзмиськод-а вордскем палъёсыдлэсь?
- Салют азьын зэмзэ ик вордскем палъёсылэсь туж мӧзмем ни вал. Соин ик, дыр, снарядэ но сыӵе кылъёс гожтӥськизы.
- Тау. Дышетсконэд капчиен мед ортчоз. Вордскем шаереныд данъяськон мылкыдыд ноку медаз кысы!
Читайте нас: