Визьбур клуб нылпиосты люказ

Та материал газетмылэн 2018-тӥ арын 22-тӥ шуркынмонэ потэм номераз печатласькиз.

Визьбур клуб нылпиосты люказ

Башкортостанысь удмуртъёслэн национально-культурной центрзылэн уж планэзъя, туэ «Ошмес» газетлэн редакциез пинал гожъясьёсын семинар ортчытыны кулэ вал. 14-тӥ шуркынмонэ ми, газетын ужасьёс, Янаул ёросысь Вуж Вараш школае вуылӥм. Та нуналэ отын «ТодАли» визьбур клубмы усьтӥськиз. Озьыен, пумиськонмы шудон амалэн радъяськиз.

Ужрадэ пыриськизы но нылпиослы ӟеч мылкыд сӥзьыса вераськизы БР-ысь Удмуртъёслэн НКЦ-енызы кивалтӥсь Салимьян Гарифуллин, солэн воштӥсез Юрис Саитов, «Ошмес» газетлэн валтӥсь редакторез Ольга Нигаматуллина, Вуж Вараш школалэн директорез Григорий Асатов.

- Малы Вуж Вараш школаез бырйимы? Малы ке шуоно ми доры трос гожтэтъёс та школаысь вуо. Нылпиос сочинениоссэс но, кылбуръёссэс но, ребусъёссэс но ысто. Соин бадӟым тау кылъёсмес вераськом удмурт кылъя но литературая дышетӥсьлы Алевтина Анатолиевна Фаткуллиналы, - дышетӥсез «Ошмес» газетлэн редакциезлэн Данъян грамотаеныз пусйыса шуиз Ольга Нигаматуллина.

Семинарлэн нырысетӥ люкетэз нылпиосты газетын ужасьёслэн уженызы тодматонлы сӥземын вал. Соин пиналъёслы «Кызьы газет лэсьтӥське но кызьы со лыдӟись доры вуэ» видеоролик возьматӥмы.

Ужрадлэн кыкетӥ люкетаз сизьыметӥ но укмысэтӥ классъёсын дышетскисьёс пыриськизы. «Италмас» но «Кизили» командаос пӧлын ӟырдыт нюръяськон пуромиз. Пиналъёс газетлэн кылдэм сюресэз сярысь но малпаськоно луизы, «Ошмесын» ужам редакторъёсты но тодазы ваизы. Командаос визькылъёсын герӟаськем малпанъёс бордын кемагес пуконо луизы. Со сяна, удмурт кыллы сӥзем тунсыко юанъёслы веразы, кылбур но пӧрмытӥзы. Кык баллы тросгес очко люкаса, азьпала потӥзы кизилиос.

Вераны кулэ, Вуж Вараш школаын дышетскисьёс ужрадлы музыкальной номеръёссэс дасяллям. «Удмурт Ералашез», кылсярысь, котькин тунсыкъяськыса учкиз. Кырӟанъёссы, эктонъёссы но усто пӧрмизы. Шуныт пумитамзы понна Вуж Вараш школалэн коллективезлы бадӟым тау кылъёсмес вераськом. Нош азьланяз та выллем пумиськонъёс мукет школаосын но луозы шуыса малпаськом.