-11 °С
Салкым
Антитеррор
Вань иворъёс
Общество
11 южтолэзь 2020, 13:50

Малпанъёссы нылпиоссы вӧзын

Киысь усем бугор куддыръя олокытчы питыра. Улон но бугор кадь ик, адямиез кытчы гинэ уг вутты. Бурай ёросысь Алтау гуртын улӥсь Светлана Захарова дуннелэн пӧртэм сэрегъёсаз вуылэмзэ тодаз вайыса, серекъяса, «мон чиган улонэз улӥ» шуэ.

Бадӟым семьяын будэм ныллы школа бере кызьы ке но ас улонзэ радъяно вал. Нырысь со Чайковскийын текстильной фабрикаын мотальщицалэсь ужзэ быдэсъям. Куинь арскын сое улон Казахстанэ вуттэм. Одӥг ар чугун сюресын ужаса, егит ныл нефтегеоразведкае кошкем, сейсмик-телефонист луэм. Дышетскыны пырон мылкыдыз сое Пермь шаерысь Губаха городэ вуттэм. Отчы со Кургак гуртысь эшеныз мынэм. Документъёссэс дыраз сётыны вутскытэк, одӥг арзэ санитаркаын ужано луиллям.
Медсестралы дышетскем ӧнерчи Пермь шаерысь Чернушка городысь эмъюртлэн хирургияя ёзэтаз одӥг ар ужаса, вордскем гуртаз отпуске бертэм. Соку Светлана гуртысьтызы Николай Захарович Захаровлы кузпаллы кошкем. Озьы буйгасьтэм сюлэмо Светлана Шарифгалиевна вордскем гуртаз ик кылем. Уж но солы шедем. Алтау гуртын фельдшер луыса ужась атаез борды санитарка луыса ужаны кутскем.
Захаровъёслэн куинь нылпиоссы вордӥськиллям. Светлана Шарифгалиевна нош ик дышетскыны пырем, фельдшерлы тодон-валан басьтэм. Атаез интые ужаны кыльыса, со кызь ар ӵоже Алтау гуртын улӥсьёслы нырысетӥ эмъюрттэт возьматэм, тазалыксэс эскерем. Света апай дас арзэ шутэтске ни. Алигес солы 65 арес тырмиз.
Николай Захарович Москваысь Крупская нимо искусствоосъя кун университетын очно-заочно дышетскем. Бурайын 1-тӥ номеро школаын вань суредаськонэн герӟаськем ужъёс со пыр потӥллям. Со Каинлыково школаын суредаськон, черчение, труд урокъёсты нуэм. Дышетсконзэ йылпумъямез бере солы та школае ик кыльыны дэмлало вылэм, но воргорон Алтауэ бертоно кариськем, сое будэтэм песянайзэ утьыны. Николай Захарович гижысь-пиньысь выль ужез боры кутскем, клубын но библиотекаын ужам. Соку отчы трос адями ветлэ вылэм. Шахматной секция ужам, пересьёс телевизор учкыны пото вылэм, мылкыд карисьёс бильярд шудӥллям. «Куинь-ньыль часозь но шудо вал, ог-огзылы сётскемзы потытэк», - уйёсы но ужамзэ тодаз вайыса вера Николай Захарович. Солы та ужаз кема ужаны кылдымтэ. Колхозазы кӧня ке плотникын тыршем, художник вылэм. Собере пилорамае ужаны потэм. Отын пенсие потытозяз тыршем. Али 74 аресъем воргорон Светаеныз мушъёссы котырын бергало, пудо вордо, нылпиоссэс витё.Ог-огзылы тыбыр пыкет луыса соос 38 ар ӵошен уло ини.
Бадӟымез пизы, Сергей, нырысь сварщиклы дышетскем, собере - эмчилы. Сергей - кардиолог. Али со семьяеныз Нефтекамскын улэ, эмчи кузпалыныз кык нылъёссэс будэто.
Валентина нылзы Бирскын дышетӥсьлы тодон-валанзэ басьтэм. Со биология-химия ӧрез быръем. Та дыре кузпалыныз Янаул ёросысь Шудек гуртын уло, соос - вить нылпиослэн анай-атайзы.
Алевтина нылзы Бирскын художниклы дышетскем. Али со Украинаын Днепропетровск улосвылын улэ. Кузпалыныз интернет пыр тодматскиллям. Зэм, вордскем палъёсаз Алевтина ӵем бертылыны уг быгаты. Но туала технологиос олокӧня иськемъёсты но герӟало. Захаровъёс нылынызы ог-огзэс адӟыса вераськыны быгато. Озьы мӧзмем сюлэм ӧжытлы буйгатске.
Захаровъёслэн малпанъёссы котьку нылпиоссы вӧзын. Соос котькудзэс шумпотыса витё.
Читайте нас в