+26 °С
Салкым
Антитеррор
Вань иворъёс
Общество
5 южтолэзь 2020, 10:45

Семьялэн шудэз яратон, тазалык но нылпиос бордын

#семья#демография#детибашкириисчастье

Тулыспал толэзь пумын Башкортостанысь Правительстволэн Премьер-министрезлэн нырысетӥ воштӥсез Андрей Назаров трос нылпиен анайёсты «Материнская слава» медален данъяз. Ӟечкылан ужрадэ республикалэн пӧртэм ёросъёсысьтыз витьтон нылкышноос вуизы. Татышлы ёросысь Таныповка гуртысь Эдита Мухаярова но соос пӧлын луиз. Нылкышноослэн нуналзы азьын егит анаен матысьгес тодматскеммы потӥз.
Вить нылпиослэн анайзы Выль Татышлы гуртын вордӥськыса будэмын. Али улоно гуртаз сое уж сюресэз вуттэм. Нефтекамскысь педколледжын тодон-валан басьтэм егит дышетӥсь Таныповкае покчи классъёсты дышетыны лыктэм. Татысен вуоно кузпалыныз, Игорен, тодматскиллям. «Дышетсконме йылпумъяса, мон Чернушка городысь одӥгаз нылпи садэ ужаны интыяськи. Егит ӧнерчи шуыса, улон инты но сёто вал, но мынам асьме палъёсы бертэме потӥз. Ӝыны арскын гуртэ бертыса, уж инты утчаны кутски. Озьы Таныповкае вуи. Шудэ монэ татын вите вылэм», - пальпотыса вера Эдита Валерьевна.
Мухаяровъёс 2008-тӥ арысен улон сюрес кузя ӵошен вамышто. Соослэсь юртсэс жингрес нылпи куараос шулдырто. Егит анай вазь ӵукна султыса, пиоссэс, Родионэн Динарез, школае дася. Соос Улысь Балтачын дышетско. Нош куать аресъем Василиса, ньыль аресъем Мираслава но кык аресъем Марианна Выль Татышлыысь нылпи садэ ветло. Эдита Валерьевна та дыре Вылысь Татышлыысь «Лидер Профф» магазинын ужа угось. Уж дураз сое кузпалыз нуллэ. Соос ньыльдон иськем сюресэз нуналаз кык пол ортчоно луо. Озьы ке но кузпалъёс гуртысьтызы кошкыны уг малпало. Соослэн кык этажъем выль юртсы липет улэ пыртэмын ни. «Корка ӝутыкумы егитъёслы чаклам кун программаен пайдаяським. Анаймурт капитал али улоно юртмес басьтыку юрттэт луиз», - вера Э. Мухаярова.
Кузпалъёслэн сюлмаськонъёссы ӧжыт ӧвӧл. Соос пудо трос вордо. Кылем ар пумын Игорь Васильевич крестьян фермер хозяйство кылдытон сярысь сюлмаськем. «Ми анаен атайлы юрттӥськиськом. Толалтэ лымы мычиськом. Сузэръёсынымы шудӥськом», - шуэ витетӥ классын дышетскись Родион. «Тусьты-пуньы но миськиськом», - ватса Динар выныз.
Семьялэн шудэз яратон, тазалык но нылпиос бордын, шуо. Та веранэн Мухаяров кузпалъёс но соглаш. Соос ваньмон дырзэс ӵош ортчытыны тыршо. «Ӝытъёсы шашкиен, шахматэн шудӥськом. Каникулъёсын нылпиосын тунсыко интыосы вуылыны тыршиськом. Толалтэ ӵошен гурезе нискыланы ветлӥськом. Уго валтӥсь интыын – нылпиослэн шудо улонзы но тазалыксы», - вера Эдита Валерьевна.
Бадӟым улонэ вамыш лэсьтыку, егит кузпалъёслы юрттэт кизэс мычись адямиос туж кулэ. Мухаяровъёс тау кылъёссэс верало анай-атайёссылы, матысьёссылы.
- Соос котькыӵе ужын юрттыны тыршо. Куддыръя пиосмес школаысь ваёно луэ. Асьмеос вутскымтэ дыръя, нылъёсты нылпи садысь басьто, - шуэ Э. Мухаярова.
Мухаяровъёслэн – асьсэлэн тунсыко, жингрес дуннезы, шуысал мон. Отын нылпиос шумпотыса уло. Омырын соослэн сайкытэсь малпанъёссы лобало. Татын яратон, шумпотон, умоезлы оскон кузёясько. Пичиос пӧлын бадӟымъёс но вань. Соос но ӟечезлы оскыса уло, нылпиоссэс улонэ шонер сюрес бырйыны дышето.
Читайте нас: