«Удмурт Кенеш» Кузебай Гердлы сӥзем лыдӟонъёс ортчытоз

«Удмурт Кенеш» огазеяськонлэн кичӧлтэмезъя Удмурт Элькунын 1999-тӥ арысен Герд лыдӟонъёс ортчытӥсько. Туэ со нырысьсэ Удмуртилэн палэназ радъяськоз. Научно-практической конференциез Татышлы ёросысь Выль Татышлыын пумиталозы. Бускельёсмылэн делегацизы республикаямы 27-тӥ тулыспалэ вуоз. Конференция Удмуртилэн кунлык басьтэмез дырысен 100 ар тырмонлы сӥземын.

Конференция туэ 23-тӥ ползэ радъяськоз. Лыдӟонъёс «Кузебай Герд, Трокай Борисов, Максим Прокопьев – Удмурт кунлыкез кылдытӥсьёс» нимамын. Со пумысен люкаськемъёслы тодмо удмурт тодосчиос Александр Шкляев, Валентина Ившина, Ранус Садиков, гожъясь Николай Кузнецов докладъёс лыдӟозы. Со сяна, ужрадын егитъёслы но нылпиослы КВН радъяськоз. Сое удмурт кун университетысь студентъёс дасяло. Азьпалтыса вераломы, юанъёс удмуртъёслэн историенызы герӟаськемын луозы.

Та нуналэ конференцилэн ужаз Шарканысь киужъёсъя центр, Удмурт Элькунысь йӧскалык библиотека, Кузебай Герд нимо национальной музей, Удмурт кун университет пыриськозы, удмурт книгаосын вуз карон радъяськоз.

Герд лыдӟонъёсын арлы быдэ Кузебай Герд нимо йӧскалык премилэсь лауреатъёссэ пусъё. Та сӥё-дано ним туэ Башкортостанысь удмуртъёслэн национально-культурной центренызы кивалтӥсьлэн воштӥсезлы Юрис Саитовлы, калык кырӟанъя но эктонъя «Айкай» театрен кивалтӥсьлы Пётр Даниловлы сётӥськоз.